ამ დრომდე გრძელდება არეულობა ბათუმის ქუჩებში – იწვის მანქანები, შენობები, ხეები. ახალგაზრდები სპეცრაზმს უპირისპირდებიან.
აჭარის სახანძრო-სამაშველო სამსახურის ცნობით, სახანძრო სამსახურის თანამშრომლები ვერ ახერხებენ იმ მანქანამდე მისვლას, რომელსაც ცეცხლი ჯერ კიდევ უკიდია.
აჭარის პოლიციის მთავარ სამმართველოსთან სახანძრო-სამაშველო სამსახურის ორ თანამშრომელს აქციის მონაწილეებმა ქვები დაუშინეს. მომხდარის შედეგად მათ დაზიანებები მიიღეს. დაშავებულ მეხანძრეებს ადგილზე სასწრაფო-სამედიცინო დახმარება გაუწიეს, ისინი ამჟამად თავს უკეთ გრძნობენ.
ბათუმში ჩასული შს მინისტრი პოლიციის სამმართველოში ძალოვანებს ხვდება. ჯერჯერობით არ არის ცნობილი როგორი იქნება მოქმედების გეგმა ქალაქში არეულობის შეჩერებისა და სტაბილურობის აღდგენისათვის.