“რა თქმა უნდა, მე ამ შესაძლებლობას ვერ გავუშვებ ხელიდან – ერთ რაღაცას გეტყვით, ოღონდ, ძალიან მოკლედ, გრძლად არა. თქვენ რამდენჯერმე ახსნეთ და ზუსტად ვიცი, რომ ბიძინა ივანიშვილი ყელში გეჩხირებათ, მაგრამ ვერ მოინელებთ, პოლიტიკურად ის იქით მოგინელებთ.” – განაცხადა დღეს ადამიანის უფლებათა დაცვის კომიტეტის თავმჯდომარემ სოფო კილაძემ.
ასე გამოეხმაურა იგი რომან გოცირიძეს რიტორიკულ კითხვაზე ,,სად არის ის ე. წ. ჭარბი ნდობა, ის კაცი რომ ამაყობდა. ჭარბი ნდობა კი არა, ჭარბი გამოჩენისაც კი ეშინია, დაიკარგა კაცი!”
ფრაქცია „ნაციონალური მოძრაობის“ თავმჯდომარემ რომან გოცირიძემ ასევე შეაფასა სახალხო დამცველის 2019 წლის ანგარიში და აღნიშნა, რომ მასში ის პერიოდია განხილული, როდესაც ადამიანის უფლებები ფეხქვეშ გაითელა.
„ის პერიოდი, რომელიც განხილულია სახალხო დამცველის მოხსენებაში, შეიძლება დავახასიათოთ, როგორც ადამიანის უფლებების ფეხქვეშ გათელვის წელიწადი: ძალადობა, თავისუფალი აქციის სასტიკი დარბევა, დამნაშავეებზე ხელის დაფარება და სამომავლო დანაშაულის წახალისება, პოლიტიკური დევნის გაგრძელება და უამრავი პოლიტპატიმარი. ქვეყანა დემოკრატიის თვალსაზრისით უკან მიდის. ქვეყანაში არ არსებობს სახელმწიფო ინსტიტუტი, რომელიც იცავს კონსტიტუციასა და ადამიანის უფლებებს. ყველაფერი დამორჩილებულია ერთ პარტიასა და ერთ პიროვნებას. ჩავთვალოთ, რომ ეს ბოლო წელიწადია დარღვევათა მთელი კასკადისა, რაც 8 წლის განმავლობაში გრძელდებოდა და რომელთა უდიდესი ნაწილი დღემდე გამოუძიებელია. არავის არ გასვლია ძალაუფლების დიდი ხნით მიტაცება. ეყო, რაც 8 წლის განმავლობაში აკეთეს. მორჩა „ქართული ოცნების“ ხელისუფლება! სად არის ის ე. წ. ჭარბი ნდობა, ის კაცი რომ ამაყობდა. ჭარბი ნდობა კი არა, ჭარბი გამოჩენისაც კი ეშინია, დაიკარგა კაცი. მორჩა „ქართული ოცნების“ ფიქტიური, ფულზე დაფუძნებული ავტორიტეტი,“- განაცხადა გოცირიძემ.