პარლამენტის თავმჯდომარე არჩილ თალაკვაძე ამბობს, რომ 20 ივნისის აქციის დაშლის დროს, “სავარაუდოდ, ძალის გადამეტება მოხდა, ვინაიდან გამოძიება სწორედ ამ მუხლით არის დაწყებული”. 

მისი თქმით, 20 ივნისი მშვიდობიანი პროტესტით დაიწყო და საქართველოს პარლამენტზე ძალადობრივი შეტევით დასრულდა. 

“რაც შეეხება აქციას, ჩვენ ხომ ვთანხმდებით იმაზე, რომ აქციის პირველი ნაწილი მშვიდობიანი პროტესტი იყო, მეორე ნაწილი კი, კონკრეტული რადიკალური პოლიტიკური ჯგუფის მიერ ორგანიზებული ძალადობრივი შეტევა პარლამენტზე”, – ამბობს თალაკვაძე

,,20 ივნისის დღე იყო ჩვენი შეცდომა, 20 ივნისის ღამე იყო “ნაციონალური მოძრაობის” დანაშაული.” – ამბობს საპარლამენტო უმრავლესობის წევრი ირაკლი კობახიძე,

„დესტრუქციული ოპოზიცია შეეცადა, პროტესტი საკუთარი პოლიტიკური მიზნებისთვის გამოეყენებინა და საპროტესტო ტალღა ძალადობრივ აქციაში გადაზარდა. პარლამენტის შენობასა და საპოლიციო ძალებზე მათ ინტენსიური შტურმი მიიტანეს და ფაქტიურად, ხელისუფლების ძალადობრივი გზით დამხობა სცადეს“, – ამის შესახებ მმართველი პარტიის „ქართული ოცნების” განცხადებაშია ნათქვამი, რომელიც პარტიამ 20 ივნისის მოვლენებთან დაკავშირებით გაავრცელა.