გარეჯობის დღესასწაულს მოლოცვის მოსურნეთა დიდი ნაწილი შორიდან ადევნებს თვალს, რადგან აზერბაიჯანის ხელისუფლებამ საქართველოს შესაბამის უწყებებს წაუყენა ულტიმატუმი, რომ თუ ვინმემ აზერბაიჯანის საზღვარი გადალახა, მესაზღვრეები მკაცრად უპასუხებენ.
დღეს დავით გარეჯის მიმდებარე ტერიტორიაზე პატრიარქის თანამოსაყდრე, მეუფე შიო მივიდა. მან იმედი გამოთქვა, რომ აზერბაიჯან-საქართველოს შექმნილი ორმხრივი კომისია შეძლებს, რომ საქართველოს მართლმადიდებელ ეკლესიას იქ წირვა-ლოცვის აღდგენის უფლება მიეცეს.
“ეს ადგილი დავით გარეჯელის თანამედროვეა, თქვენ იცით, რომ ვერ ვწირავთ, ვერ ვლოცულობთ აქ. ჩვენ დღეს ვევედრეთ ღირს მამა დავითს, რომ ეს ვითარება შეიცვალოს”, – თქვა მან.
მან არ ისაუბრა სახელმწიფო უსაფრთხოების სამსახურის მიერ დაწყებულ გამოძიებაზე:
“ჩვენ გვაქვს იმედი, რომ ჩვენი ძმობაც შენარჩუნდება, რომელიც გვაქვს აზერბაიჯანელ მოსახლეობასთან და ამასთან ერთად სიმართლე დადგინდება”.