დიდი ბრიტანეთი და კანადა მხარს არ უჭერენ მსოფლიოს წამყვანი სახელმწიფოების გაერთიანებაში – „დიდ შვიდეულში“(G7) რუსეთის დაბრუნებას, როგორც ეს აშშ-ის პრეზიდენტს სურს.

დიდი ბრიტანეთის მთავრობაში განაცხადეს, რომ რუსეთს გაერთიანება დაატოვებინეს 2014 წელს, ყირიმის ანექსიის გამო და მას შემდეგ რუსეთის ქცევაში არაფერი შეცვლილა. ამასთან, ლონდონში მიიჩნევენ, რომ თუ აშშ-ის პრეზიდენტს, როგორც მომავალი სამიტის მასპინძელს სურს რომელიმე ქვეყნის ლიდერის სტუმრის სტატუსით მიწვევა, ეს მისი გადასაწყვეტია.

კანადის პრემიერ-მინისტრ ჯასტინ ტრუდოს განცხადებით, ყირიმში შეჭრის გამო გარიცხული რუსეთი საერთაშორისო ნორმების დარღვევას განაგრძობს და ეს არის მიზეზი, რომლის გამოც გაერთიანების მიღმა უნდა დარჩეს.

ცოტა ხნის წინ, აშშ-ის პრეზიდენტმა განაცხადა, რომ მსოფლიოს 7 წამყვანი სახელმწიფოს გაერთიანების ფორმატი მოძველდა და მასში უნდა მიიღონ სხვა ქვეყნებიც, მაგალითად, რუსეთი და ინდოეთი. G7-ს ლიდერთა სამიტი ივნისში, აშშ-ში უნდა გამართულიყო, თუმცა კორონავირუსის პანდემიის გამო სექტემბრამდე გადაიდო. 1 ივნისს, დონალდ ტრამპმა და რუსეთის პრეზიდენტმა პუტინმა მომავალ სამიტზე ტელეფონით ილაპარაკეს.

მსოფლიოს წამყვანი ეკონომიკის დემოკრატიული სახელმწიფოების კლუბი აშშ-ის, გერმანიის, საფრანგეთის, დიდი ბრიტანეთის, იტალიის, კანადის და იაპონიის ლიდერებს აერთიანებს. კლუბში 1998 წელს მიღებული რუსეთი გაერთიანებიდან ყირიმის ანექსიის გამო გარიცხეს.