ე.წ. ციანიდის საქმეზე დაკავებული გიორგი მამალაძის დაკითხვა ე.წ. მატროსოვის ციხეში 13:00 საათისთვის განახლდება. სასჯელაღსრულების დაწესებულებასთან უკვე იმყოფებიან მკვლელობის მომზადების მცდელობის ბრალდებით დაკავებული დეკანოზის ადვოკატები.
ბრალდებულის უფლებადამცველის მიხეილ რამიშვილის თქმით, გუშინ მიმდინარე დაკითხვისას მამა გიორგი მამალაძემ პროკურატურისგან ოჯახის წევრთა დაცვა მოითხოვა. რამიშვილის განცხადებით, ამ მოთხოვნით დაცვის მხარე დღეს პროკურატურას ოფიციალურად მიმართავს.
„ძალიან ბევრი ისეთი კითხვები დაისვა, რაზეც მამა გიორგიმ კატეგორიულად განაცხადა, რომ კითხვებზე პასუხი გაეცემა იმის შემდეგ, როდესაც მისი ოჯახის წევრები იქნებიან დაცვით უზრუნველყოფილი. ამის თაობაზე დღეს ჩვენ მივმართავთ პროკურატურას, დავუსაბუთებთ თუ რის საფუძველზე უნდა მოხდეს და რატომ ითხოვს მამა გიორგი თავისი ოჯახის წევრების დაცვის უზრუნველყოფას. შესაბამისად, ეს მათი პრეროგატივაა, უნდა იმსჯელონ," – განაცხადა რამიშვილმა.
რაც შეეხება ციანიდს, რომელიც პროკურატურის ინფორმაციით, მამა გიორგი მამალაძის ჩანთიდან იქნა ამოღებული, ადვოკატი ამბობს, რომ ჩანთაში მომწამვლელი ნივთიერება ციანიდი დეკანოზს თავად არ ჩაუდია.
"აღნიშნული ციანიდი, მომწამვლელი ნივთიერება, მამა გიორგის თავის ჩანთაში, თავის ხელით არ ჩაუდია. შესაბამისად ამაზე ვიმსჯელებთ შემდეგში და ჩვენ ჩვენს პოზიციას დავუმტკიცებთ, პროკურატურამ კი თავისი პოზიცია დაგვიმტკიცოს,“ – აცხადებს მიხეილ რამიშვილი.
ადვოკატები აცხადებენ, რომ გიორგი მამალაძე პასუხობს ორ ძირითად კითხვას ციანიდსა და უნომრო იარაღზე, თუმცა დეტალებზე საუბარი ადვოკატებს არ შეუძლიათ.