„ლეიბორისტული პარტიის” ოფისში ოპოზიციური პარტიების ლიდერების შეხვედრაზე პარტიების ლიდერები აცხადებენ, რომ ხელისუფლებს მოუწევს შეასრულოს რვა მარტის შეთანხმება ყველა პუნქტის თანახმად, წინააღმდეგ შემთხვევაში საკადრის პასუხს მიიღებს.

„ახალი საქართველოს“ ლიდერის გიორგი ვაშაძის განცხადებით, საჭიროების შემთხვევაში, აქციები განახლდება. როგორც მან „ლეიბორისტული პარტიის“ ოფისთან ჟურნალისტებს განუცხადა, თუ „ქართული ოცნება“ კვლავ მოინდომებს მოტყუებას, ტყუილს ექნება შესაბამისი პასუხი.

„პირდაპირ გეტყვით, რომ აქციები, როგორც ერთ-ერთი მთავარი სამოქმედო მექანიზმი, ყოველთვის დღის წესრიგშია, მაგრამ აქცია ჩვენი თვითმიზანი ხომ არაა? სამი თვე ცივ ზამთარში ქუჩაში ვიდექით. იმიტომ გვაქვს ეს შედეგი, რაც გვაქვს დღეს. საჭირო იქნება? რაღა თქმა უნდა, ისეთივე არაძალადობრივი ფორმით, რომელიც სრულიად ახალი ფორმა იყო საქართველოს უახლეს ისტორიაში, შეიძლება აქციებიც იყოს და ყველაფერი. თუ „ქართული ოცნება“ კვლავ მოინდომებს ჩვენს მოტყუებას, ამ ტყუილს ექნება შესაბამისი პასუხი“,-აღნიშნა ვაშაძემ.

ნუ ვიმარჩიელებთ, მე იმედი მაქვს, რომ ხელისუფლებას ეყოფა გონიერება, შეთანხმება ბოლომდე შესრულდეს, – ასე უპასუხა „ერთიანი საქართველოს” ლიდერმა ნინო ბურჯანაძემ ჟურნალისტებს კითხვას, რა მოხდება, თუ გიორგი რურუას პატიმრობიდან არ გაათავისუფლებენ.

როგორც ბურჯანაძემ აღნიშნა, „რადგან ხელისუფლება და ოპოზიცია შეთანხმდა, ე.ი. ის ყველა შემთხვევაში უნდა შესრულდეს”.

„მე მიმაჩნია, რომ ძალიან მნიშვნელოვანია ის კოორდინარება და ერთობლივი ქმედებები, რომელსაც ახორციელებს ოპოზიცია. ჩვენმა ერთიანობამ, ამ მაგიდის ერთიანობამ უზრუნველყო ის, რომ ჩვენ გვქონდა უპრეცედენტო მხარდაჭერა საერთაშორისო თანამეგობრობის მხრიდან და ხელისუფლება იძულებული გახდა, დათმობებზე წამოსულიყო. ძალიან მნიშვნელოვნად მიმაჩნია შეთანხმების ბოლომდე შესრულება, აუცილებლად უნდა იქნეს საკონსტიტუციო ცვლილება მიღებული იმიტომ, რომ ეს არის შანსი იმის, რომ ქვეყანაში ნორმალური ვითარება იყოს წინაასარჩევნოდ და შემდეგ არჩევნები ნორმალურ გარემოში ჩატარდეს.

ამ ტიპის ერთობა და კოორიდინირება, რომელიც ახლა არის და რომელიც დარწმუნებული ვარ, შეთანხმდება იმაზე, რომ ერთმანეთის ხმები დავიცვათ როგორც მინიმუმ, მისცემს ჩვენს მოსახლეობას იმის გარანტიას, რომ ვერავინ გაბედავს არჩევნების გაყალბებას, ეს კი მომავალი მშვიდობიანი და სტაბილური ეკონომიკური განვითარების გარანტია იქნება. დღეს ვასაუბრებთ მიღწეულ შედეგებზე, ვისაუბრებთ შემდგომი ტიპის კოორდინაციაზე და ალბათ, სხვა საკითხებზე”, – განაცხადა ბურჯანაძემ.

„ ეჭვგარეშეა, ოლიგარქს გიორგი რურუას გათავისუფლება მოუწევს. ხომ შეეშინდა 8 მარტის შეთანხმების ვერასრულების. ამიტომ გახდა ის იძულებული, რომ გაეთავისუფლებინა ოქრუაშვილი და უგულავა, მაგრამ 8 მარტის შეთანხმების ერთ-ერთი სუბიექტი, ასევე იყო გიორგი რურუა. თუ გიორგი რურუას არ გამოუშვებს ციხიდან, მისი პირადი ტყვეობიდან, ეს შეთანხმება მაინც არ აღსრულდება, ანუ ოპოზიციური პარტიები მხარს არ დავუჭერთ. შესაბამისად,  ბიძინა ივანიშვილის ინტერესშივე არის, რომ პოლიტიკური პატიმარი, გიორგი რურუა, გაათავისუფლოს, თანაც ამ შემთხვევაში მას არ დასჭირდება სალომე ზურაბიშვილი, მას დასჭირდება მორჩილი ბატონი შოთაძე. პროკურატურა უბრალოდ გამოიჩენს „კეთილ ნებას“ და გნებავთ სამაჯური გაუკეთონ რურუას, ფაქტია ეს ადამიანი უნდა გათავისუფლდეს,“ – განაცხადა „ნაციონალური მოძრაობის“ ერთ-ერთმა ლიდერმა ნიკამ მელიამ