პრემიერმინისტრმა, გიორგი გახარიამ, 14 მაისს ბრიფინგი გამართა და განაცხადა, რომ ახალი კორონავირუსით გამოწვეული ეპიდემიური სიტუაციის შედარებით დასტაბილურების გამო, მთავრობამ მიიღო გადაწყვეტილება, საგანგებო მდგომარეობით გათვალისწინებული ზოგიერთი შეზღუდვა დაგეგმილზე ადრე მოხსნას. 

პრემიერმინისტრის განმარტებით, ძალაში რჩება ე.წ კომენდანტის საათი, რომლის ფარგლებშიც ადამიანებს ეკრძალებათ გადაადგილება საღამოს 21:00 საათიდან დილის 06:00 საათამდე.

18 მაისიდან გაიხსნება  სილამაზის სალონები და ესთეტიკური ცენტრები. ამასთან,  მოიხსნება 3 ადამიანზე მეტის შეკრების შეზღუდვა, როგორც ღია, ისე დახურულ სივრცეებში. 

თუმცა, მიუხედავად ამისა, კვლავ ძალაში რჩება შეზღუდვა, რომელიც კრძალავს ერთ ავტომობილში სამ ადამიანზე მეტის ყოფნას, მიუხედავად იმისა, ოჯახის წევრები არიან, თუ უცხო ადამიანები. ასევე ძალაში რჩება შეზღუდვა, რომლის მიხედვითაც, მძღოლის გვერდით სავარძელი თავისუფალი უნდა იყოს. 

პრემიერმინისტრს არ განუმარტავს რატომ ტოვებს ამ შეზღუდვებს ძალაში და მოკლ კომენტარით შემოიფარგლა:

“ამ შეზღუდვას, მიუხედავად ყველაფრისა, აქვს ძალზედ მნიშვნელოვანი ეპიდემიური აზრი, რასაც ჩვენ ექიმები გვარწმუნებენ და ჩვენ მათი გვჯერა”, – განმარტავს მთავრობის მეთაური.