საფრანგეთი, საავადმყოფოების დასახმარებლად, ანტიკვარულ ავეჯს გაყიდის.

ანტიკვარული ავეჯის ეროვნული კოლექცია საკუთარ საცავებში არსებული ანტიკვარიატის სიას ადგენს, რომელსაც აუქციონზე სექტემბერში გაიტანენ.

ჯერ-ჯერობით უცნობია, კონკრეტულად რა გავა აუქციონზე. კულტურის სამინისტროში შემავალი სააგენტოს Mobilier National დირექტორი ამბობს, რომ სიაში შევა კულტურული მემკვიდრეობის თვალსაზრისით ნაკლებად ფასეული ნივთები, რომლებიც განსაკუთრებულად გამორჩეულ პირებს არ გამოუყენებიათ. ფრანგული მედიის ცნობით, მეცხრამეტე საუკუნის სულ მცირე 100 ნივთს გაყიდიან.

Mobilier National პასუხისმგებელია ოფიციალური შენობების ავეჯით მოწყობაზე, მათ შორისაა ელისეის სასახლე. მათ განკარგულებაშია 130,000-ზე მეტი ხალიჩა, სკამი, მაგიდა, კერამიკა, ფაიფური, ჭაღი და სხვა ავეჯი.

აუქციონი საფრანგეთის საავადმყოფოების დასახმარებლად 20-21 სექტემბერს გაიმართება. შესული თანხა გადაირიცხება პარიზის და საფრანგეთის საავადმყოფოების ფონდში, რომლის პრეზიდნეტი ქვეყნის პირველი ლედი ბრიჯიტ მაკრონია.