მარნეულის მუნიციპალიტეტ სოფელ შულავერში მოსახლეობა საპროტესტო აქციას მართავს.
ისინი ამბობენ, რომ კორონავირუსთან დაკავშირებით დაწესებული შეზღუდვების გამო სოფლის მეურნეობის ნაწარმს ვერ ყიდიან და უფუჭდებათ.
„რადიო მარნეულის“ ინფორმაციით, დაახლოებით 5 სოფლის მოსახლეობა შეიკრიბა და გზა გადაკეტეს. ისინი ადგილობრივი თვითმმართველობის წარმომადგენლებს ელოდებიან და მათგან დახმარებას ითხოვენ.
– გვეუბნებიან, დაჯექი სახლში, როდემდე? ყველას სესხები გვაქვს.
– კვირაში ერთხელ მოდიან, ვითომ რეალიზაცია არის, მაგრამ სად არის?
– ხალხს პურის ფული არ აქვს, ბანკების ვალებს რა ვუყოთ?
ამბობენ აქციის მონაწილეები.
დემონსტრანტებს შეუერთდნენ ევროპული საქართველოს მარნეულის ოფისის ლიდერი აჰმედ იმამკულიევი და ერთიანი ნაციონალური მოძრაობის მარნეულის ოფისის ლიდერი აზერ სულეიმანოვი. ადგილზე მობილიზებულები არიან სამართალდამცველებიც
დემონსტრანტებთან მარნეულის მერი ზაურ დარგალი და ქვემო ქართლის სახელმწიფო რწმუნებული შოთა რეხვიაშვილი მივიდნენ. ისინი მიიჩნევენ, რომ აქციას პოლიტიკური სარჩული აქვს, რასაც “სამწუხაროდ” აფასებენ.
პარალელურად, ზაურ დარგალი დემონსტრანტებს ამშვიდებს, რომ გზები მალე გაიხსნება.”მოსავლის გატანის მიმართულებით უკვე რამდენიმე დღეა ვმუშაობთ, თუმცა მოცულობა დიდია და დამატებითი რესურსებია საჭირო, რომ ადგილობრივი მოსახლეობის პროდუქტი გავიდეს,”- ამბობს ზაურ დარგალი.
შეგახსენებთ, მარნეულში უკვე ერთი თვეა მკაცრი კარანტინია გამოცხადებული