“ზუგდიდში არ დაფიქსირებულა ადვოკატის კორონავირუსით დაინფიცირების შემთხვევა და არც სხვა ადვოკატი გვყავს ამ სიმპტომებით. “- ამის შესახებ “ოდიშინიუსს” საზოგადოებრივი ჯანდაცვის ცენტრის ხელმძღვანელმა ნანა ოდიშარიამ განუცხადა. მისი თქმით, ზუგდიდში კორონავირუსის დიაგნოზით მხოლოდ ერთი პაციენტი მკურნალობს და ის ადვოკატი არაა. ოდიშარია მოუწოდებს ყველას, სიფრთხილით მოეკიდონ ამ საკითხს და ნუ გაავრცელებენ გადაუმოწმებელ ინფორმაციას ასეთ რთულ ვითარებაში, რადგან ეს მოსახლეობაში პანიკის გაღვივებას უწყობს ხელს.
შეგახსენებთ, რომ დღეს ქრონიკა +-ის რედაქტორმა ელისო კილაძემ გამოაქვეყნა პოსტი, სადაც წერია, რომ ზუგდიდში ერთ ადვოკატს დადასტურებული კორონავირუსი აქვს, ხოლო მეორის პასუხებს დღეს ელოდებიან.
” რატომ ზუგდიდი?!
ორი პირი (ერთი ცნობილი ადვოკატი და მეორე ნაკლებადცნობილი) ამერიკიდან დაბრუნდა თურქეთის გავლით!
იეღოველები არიან,კონტაქტებიც ჰქონდათ და ბროშურებიც ჩამოიტანეს(სავარაუდოდ,დაარიგეს)
ერთს დადასტურებულად კორონა აქვს,მეორეს პასუხი დღეს იქნება !
ანალიზები როგორ აუღეს,სხვა თემაა !(იეღოვას კონგრესთან უნდა შევათანხმოთო)
ცოცხალი თავით,ვერ (არ) იხსენებენ კონტაქტებს !
ასე დაიკარგა გადაცემის ჯაჭვი !
ზუგდიდი არაა დიდი ქალაქი,ყველა ერთმანეთს იცნობს და ვისაც ამ ორეულთან შეხება გქონდათ,გადადით თვითიზოლაციაში! “- წერს კილაძე. ეს ინფორმაცია გაავრცელეს სააგენტოებმაც.
შეგახსენებთ, რომ ზუგდიდის ინფექციურ საავადამყოფოში ამ დროისთვის კორონავირუსის დიაგნოზით ერთი პაციენტია მოთავსებული. რაც შეეხება სენაკელ ახალგაზრდა ქალს და ჩხოროწყუდან მამაკაცს, რომლებიც ხველებისა და ციების ჩივილებით 28 მარტს შეიყვანეს საავადმყოფოში, მათი ანალიზების გაგზავნა ლუგარის ლაბორატორიაში არც დამდგარა დღის წესრიგში, რადგან ოდიშარიას თქმით, დინამიკაში დაკვირვებისას კორონასთვის დამახასიათებელი სიმპტომები გამოირიცხა და ისინი დღეს გაეწერებიან დაწესებულებიდან. ექიმების დაკვირვების ქვეშ რჩება ახალგაზრდა მამაკაცი სვანეთიდან, რომელიც კახათში სტუმრად იმყოფებოდა, ის ინფექციურ საავადმყოფოში 28 მარტს შეიყვანეს.