შინაგან საქმეთა სამინისტროს საგანგებო სიტუაციების მართვის სამსახურმა მარნეულში საველე ჰოსპიტალი მოაწყო. ინფორმაციას შინაგან საქმეთა სამინისტრო ავრცელებს.
მთავრობის უწყებათშორისი საკოორდინაციო საბჭოს გადაწყვეტილებით, შინაგან საქმეთა სამინისტროს საგანგებო სიტუაციების მართვის სამსახურს, მარნეულისა და ბოლნისის მუნიციპალიტეტებში საველე ინფრასტრუქტურის მოწყობა დაევალა.
საგანგებო სიტუაციების მართვის სამსახურის თანამშრომლები, საველე ჰოსპიტალის მოწყობის მიზნით, მთელი ღამის განმავლობაში მუშაობდნენ.
„საველე ჰოსპიტალის გარდა, ადგილზე მოეწყო სპეციალური სივრცე, სადაც ინტენსიურად მოხდება იმ პერსონალის დეზინფექცია, ვისაც შეხება ექნება საველე ჰოსპიტალში მყოფ პირებთან. შესაბამის სამუშაოებს საგანგებო სიტუაციების მართვის სამსახურის ქიმიურ, ბიოლოგიურ, რადიაციულ და ბირთვულ ინციდენტებზე რეაგირების ჯგუფები ჩაატარებენ.
მარნეულისა და ბოლნისის მუნიციპალიტეტებში კარანტინის გამოცხადების შემდეგ ვითარებას სამართალდამცველები აკონტროლებენ: აკრძალულია ქალაქში შესვლა და გამოსვლა. პოლიციელების გარდა, ადგილზე მობილიზებულია თავდაცვის ძალები.
შესასვლელთან დგანან ექიმები, რომლებიც ტერიტორიაზე შემსვლელებს სიცხეს უზომავენ. იმ ავტომანქანებს, კი რომლებსაც კარანტინის ზონაში შესვლის საშუალება ეძლევათ, სპეციალური ხსნარით ამუშავებენ.
დღეს დილით მარნეულში უკვე შევიდა ექიმთა ჯგუფი, რომელმაც პაციენტები კორონავირუსის სიმპტომებზე უნდა გამოიკვლიოს. იმ მოქალაქეებს კი, რომლებსაც სამართალდამცველები კარანტინის ზონაში უშვებენ, აფრთხილებენ, რომ ვეღარ დატოვებენ ტერიტორიას.
რაც შეეხება კარანტინის ზონას, იქ მოსახლეობას გადაადგილება შეუძლია მხოლოდ გადაუდებელი შემთხვევების დროს, მათ შორის სურსათისა და მედიკამენტების შესაძენად.
მარნეულისა და ბოლნისის მუნიციპალიტეტები მკაცრ საკარანტინო რეჟიმზე მას შემდეგ გადავიდა, რაც მარნეულში კორონავირუსით ქალი დაინფიცირდა, რომლის ინფიცირების წყაროს დადგენაც ვერ მოხერხდა
.