ქვეყნის პრემიერ-მინისტრმა ირაკლი ღარიბაშვილმა მთავრობის სხდომაზე მოსახლეობას მოუწოდა, დაეყრდნონ მთავრობისა და ეროვნული ბანკის მიერ მიწოდებულ ინფორმაციას და არ აყვნენ ექსპერტების პროგნოზებს.
"ფსიქოლოგიურ-ემოციური აჟიოტაჟი", – ასე შეაფასა მან ლართან დაკავშირებით შექმნილ ვითარება. ",,უნდა დავასკვნათ, რომ ეს არის აჟიოტაჟი, რომელიც უნდა მოიხსნას და ადრე თუ გვიან, მოიხსნება კიდეც. ჩვენ ვვარაუდობთ, რომ ეს მალე გადაივლის. ასეთია ეროვნული ბანკის ვარაუდიც, ამიტომ მინდა მოსახლეობას მივმართო, რომ სიმშვიდე შეინარჩუნოს. მინდა ჩვენს მოქალაქეებს და ბიზნესმენებს ვუთხრა, ნუ აჰყვებიან მედიასაშუალებებს, მათ მიერ შექმნილ აჟიოტაჟს და ქაოსს და უპასუხისმგებლო ექსპერტებისა და პოლიტიკოსების გამონათქვამებს. ოფიციალური ინფორმაცია მომდინარეობს მთავრობისა და ეროვნული ბანკისგან. გთხოვთ, დაეყრდნოთ ამ ინფორმაციას და არა ვიღაც გაუგებარ, უპასუხისმგებლო პოლიტიკოსებსა და ექსპერტებს, რომლებიც ყველაფრის ექსპერტები არიან –განაცხადა ირაკლი ღარიბაშვილმა.
ფინანსთა მინისტრის ნოდარ ხადურის თქმით, ლარის კურსის ცვლილება დროებითი მოვლენაა და ეროვნული ვალუტა დასტაბილურდება.