13 დეკემბერს მიღებულ იქნა მთავრობის დადგენილება №548 „ღორის იდენტიფიკაცია-რეგისტრაციისა და მისი სადგომის რეგისტრაციის წესის დამტკიცების შესახებ“, რომელიც არეგულირებს ღორების იდენტიფიკაცია-რეგისტრაციის, სადგომის რეგისტრაციის, სადგომის წიგნაკის, მონაცემთა ელექტრონული ბაზის წარმოების წესს, სახელმწიფო კონტროლის განხორციელების პირობებსა და შემზღუდავ ღონისძიებებს.
განმარტებითი ბარათის თანახმად, ღორის იდენტიფიკაცია-რეგისტრაციის და მისი სადგომის რეგისტრაციის მიზანს წარმოადგენს ღორის და მისი სადგომის შესახებ ერთიანი საინფორმაციო ბაზის შექმნა, აღრიცხვიანობის რეგულირება, სრული ინფორმაციის ფლობა და მიკვლევადობა, ღორის ჯანმრთელობის დაცვა, ეპიდემიოლოგიური მდგომარეობის მართვა და ვეტერინარული კეთილსაიმედოობის უზრუნველყოფა, საზოგადოებრივი ჯანმრთელობის დაცვა და მომხმარებლისათვის სარწმუნო ინფორმაციის მიწოდება ღორისგან მიღებული პროდუქტების წარმოშობისა და უვნებლობის შესახებ, ქვეყნის შიგნით ღორის გადაადგილებასა და ექსპორტ-იმპორტზე ვეტერინარული კონტროლი და სანაშენე საქმიანობის გაუმჯობესება-სრულყოფა.
ღორის იდენტიფიკაციისა და რეგისტრაციის ელემენტებია: ნიშანდება, სადგომის რეგისტრაცია და სადგომის წიგნაკი, გადაადგილების დოკუმენტი და მონაცემთა ელექტრონული ბაზა.
ღორების იდენტიფიკაცია-რეგისტრაციას სსიპ სურსათის ეროვნული სააგენტო 2018-2021 წლებში, მისთვის სახელმწიფო ბიუჯეტიდან გამოყოფილი ასიგნებების ფარგლებში გეგმავს, ხოლო 2022 წლიდან კი -მესაკუთრის ხარჯით.
დადგენილება ძალაში 2018 წლის პირველი იანვრიდან შედის.
,,მართლაც პიარი არ უვარგათ ამ ღორებს, თორემ როგორ შეიძლება ამ მუხლჩაუხრელად მშრომელ, სუპერკომპეტენტურ მთავრობაზე აუგი თქვას კაცმა?!- წერს ზაზა ბიბილაშვილი – მაშინ, როცა მთელი საქართველო ლარის კურსზე უსაფუძვლო, ბატონიბიძინას მტრების მიერ ხელოვნურად ინსპირირებულ პანიკასაა აყოლილი, მთავრობა აგრძელებს რეალური, საშვილიშვილო საქმეების კეთებას. საქმეებისა, რომლებიც აუცილებლად გააბრწყინებენ ივერიას საშუალო თუ არა, გრძელვადიან პერსპექტივაში''