BBC-ის რუსული სამსახურის ცნობით, რუსეთის მმართველმა პარტიამ “ერთიანი რუსეთი” ერთხმად დაუჭირა მხარი ვლადიმირ პუტინის მიერ პრემიერმინისტრის პოსტზე წამოყენებულ კანდიდატს მიხაილ მიშუსტინს
რუსეთის დუმას ქვედა პალატა მიშუსტინის კანდიდატურას კენჭს დღეს უყრის, მას შემდეგ, რაც ის პარლამენტს მიმართავს. “ერთიან რუსეთს” პარლამენტში უმრავლესობა აქვს და მოსალოდნელია, რომ მის კანდიდატურას პარლამენტი დაამტკიცებს.
53 წლის მიშუსტინი ფედერალურ საგადასახადო სამსახურს 2010 წლიდან ხელმძღვანელობდა. მანამდე ის კომპანია UFG group-ის პრეზიდენტი იყო – ეს ერთერთი მსხვილი კომპანიაა რუსეთში აქტივების მართვისა და პირდაპირი ინვესტიციების სფეროში.
საგადასახადო სამსახურში მუშაობა მიშუსტინმა 1998 წლიდან დაიწყო. მოგვიანებით კადასტრის ფედერალურ სააგენტოს ხელმძღვანელობდა, ასევე ხელმძღვანელობდა ეკონომიკური ზონების მართვის ფედერალურ სააგენტოს.
მიშუსტინი რუსეთის ჰოკეის ფედერაციის, ასევე ჰოკეის კლუბ ЦСКА-ს სამეთვალყურეო საბჭოს წევრია.
,, ვედომოსტის” ინფორმაციით, მიხაილ მიშუსტინი პოპულარული რუსი მომღერლის, გრიგორი ლეპსის რამდენიმე სიმღერის მუსიკის ავტორია, თუმცა, გრიგორი ლეპსის წარმომადგენელი vedomosti-ისთან არ ადასტურებს, რომ სწორედ ის მიშუსტინია მუსიკის ავტორი და ამბობს, რომ უბრალოდ მისი მოგვარეა.
შეგახსენებთ, რომ 15 იანვარს რუსეთის მთავრობა პრემიერ დიმიტრი მედვედევის მეთაურობით მას შემდეგ გადადგა, რაც რუსეთის პრეზიდენტმა ვლადიმირ პუტინმა წამოაყენა ინიციატივა რეფერენდუმის ჩატარების შესახებ. რეფერენდუმი საკონსტიტუციო ცვლილებების საკითხზე უნდა ჩატარდეს.
პუტინს სურს, რუსეთი საპრეზიდენტოდან საპარლამენტო რესპუბლიკად იქცეს, სადაც ძირითადი ძალაუფლება პრემიერმინისტრს ექნება და ამგვარად მეოთხე საპრეზიდენტო ვადის ამოწურვის შემდეგ კვლავ შეინარჩუნოს მმართველობა.
პუტინს ვადა 2024 წელს ეწურება. მას არ დაუკონკრეტებია, რას აპირებს ამის შემდეგ, თუმცა რუსეთის კონსტიტუცია ზედიზედ მესამე ვადით კენჭისყრის უფლებას არ მისცემს, შესაბამისად სავარაუდო იყო, რომ მას საკონსტიტუცო ცვლილება მოეთხოვა.