„გადავარჩინოთ შემდეგი ლუკა“- ამ სლოგანით ზუგდიდში სტუდენტებმა და სამოქალაქო აქტივისტებმა აქცია გამართეს. აქციის მონაწილეებს ხელში ეჭირათ პლაკატები: „სისტემა ისევ კლავს“, „სისტემა უნდა დაინგრეს“, „ჩვენ გვახსოვს დემურ სტურუა“, „ბრძოლა უკეთესი მომავლისთვის“, „არ დანებდე“. აქციის ერთ-ერთი ორგანიზატორის დათა აქუბარდიას თქმით, 22 წლის დემურ სტურუა პოლიციის ძალადობის მსხვერპლი გახდა, სწორედ მოძალადეების დაუსჯელობის შედეგია 15 წლის ლუკას სიკვდილიც, ამიტომ მისი თქმით, სისტემა უნდა დაინგრეს, რომ გადარჩეს შემდეგი ლუკა. შეგახსენებთ, რომ 15 წლის ლუკა სირაძე 17 დეკემბერს გარდაიცვალა მას შემდეგ, რაც მან გარდაცვალებამდე რამდენიმე დღით ადრე თვითმკვლელობა სცადა. პოლიცია მას “მწვანე სკოლის” შენობაში შეპარვასა და კედელზე წარწერების გაკეთებას ედავებოდა. ოჯახის ინფორმაციით, არასწრულწლოვანს პოლიციის განყოფილებაში დედის თანდასწრებით ემუქრებოდნენ და მისგან დანაშაულის აღიარებას ითხოვდნენ.