„ლუკასთვის“, „მკვლელი სისტემა“, – ამ წარწერებით ზუგდიდში სხვა ქალაქების მსგავსად 15 წლის ლუკა სირაძის გარდაცვალების ფაქტთან დაკავშირებით საპროტესტო აქცია გაიმართა. აქციას, არასამთავრობო ორგანიზაციის, მედიის, სამოქალაქო აქტივისტები და რიგითი მოქალაქეები ესწრებოდნენ. აქციის მონაწილეების თქმით, ამ საქმეში მონაწილე ყველა დამნაშავე კანონის წინაშე უმკაცრესად უნდა დაისაჯოს და მოხდეს საქმის ობიექტური გამოძიება. აქვე შეგახსენებთ, რომ 15 წლის მოზარდი, ლუკა სირაძე 12 დეკემბერს მე-9 სართულიდან გადმოხტა და სამწუხაროდ იგი, გუშინ საავადმყოფოში გარდაიცვალა. აღნიშნულ ფაქტს წინ უძღოდა სკოლის ტერიტორიაზე გაკეთებული წარწერები, რის გამოც იგი პოლიციაში დაკითხეს. ლუკას მშობლების თქმით, პოლიციაში მოზარდზე ფსიქოლოგიური ზეწოლა განხორციელდა, რამაც იგი თვითმკვლელობამდე მიიყვანა.