ნატო-ს გენერალურმა მდივანმა იენს სტოლტემბერგმა ღია წერილით მიმართა დონალდ ტრამპს. წერილში საუბარია უსაფრთხოების კუთხით არსებულ გამოწვევებზე და ევროპისა და შეერთებული შტატების ძლიერი პარტნიორობის აუცილებლობაზე
სტოლტენბერგი აცხადებს, რომ შემტევი რუსეთის, ტერორიზმის, ჩრდილო აფრიკასა და ახლო აღმოსავლეთში არსებული კონფლიქტების ფონზე ამ პარტნიორობის ეჭვქვეშ დაყენების დრო არ არის. ნატო-ს ხელმძღვანელმა დონალდ ტრამპს მიანიშნა, რომ 67 წლიანმა პარტნიორობამ დაამარცხა საბჭოთა კავშირი და ცივი ომი დაასრულა, ასევე 11 სექტემბრის ტერაქტები შეახსენა და მიუთითა, რომ შეერთებულ შტატებზე თავდასხმა ნატო-მ ყველა წევრ ქვეყანაზე თავდასხმად შეაფასა და ავღანეთის ოპერაციაში ჩაერთო.
სტოლტენბერგი წერს, რომ ალიანსის ლიდერები ყოველთვის აცნობიერებდნენ, რომ ძლიერი და უსაფრთხო ევროპა ნიშნავს ძლიერ და უსაფრთხო ამერიკას.
მისი თქმით, დღევანდელ დროს მარტო დარჩენა არ არის გამოსავალი და გლობალურ უსაფრთხოებას ძლიერი ამერიკა და ერთიანი ევროპა სჭირდება.
შეგახსენებთ, დონალდ ტრამპი წინასაარჩევნო კამპანიის ერთერთი მნიშვნელოვანი მესიჯი იყო, რომ ნატო არაეფექტური ორგანიზაციაა, აშშ-ს ალიანსის შენახვა ძალიან ძვირი უჯდება და ქვეყანას აღარ აქვს ამის შესაძლებლობა. მისი თქმით, აშშ-მ უნდა აწონ-დაწონოს, ხომ არ ჯობია ამიერიდან ნატოს "შენახვაში" გაცილებით ნაკლები თანხები იხადოს.