სამთავრობო ხარჯების შემცირების აუცილებლობაზე საუბრობენ ეკონომიკური ექსპერტები. მათი ნაწილი ლარის კურსის კიდევ უფრო გაუფასურებას არ გამორიცხავს, რასაც შესაძლოა ინფლაცია და ფასების მკვეთრი მატება მოჰყვეს.„სანამ არსებობს ეროვნული ბანკი, ასეთი ფუნქციებით და ასეთი დამოკიდებულებით, სანამ მთავრობა აგრძელებს იმასა რასაც აკეთებს, უბრალოდ ტექნიკურად შეუძლებელია, რომ სხვა რამეს ველოდეთ, გარდა იმისა, რომ გრძელვადიან პერიოდში თანდათან ველოდეთ გაუარესებას. საჭიროა სამთავრობო ხარჯების შემცირება და ამ მავნე პროექტების შეჩერება. საბაზრო სისტემისთვის დათმობა ასპარეზის და არა ხელოვნური ჩარევა საბაზრო სისტემაში,“ – განაცხადა ახალი ეკონომიკური სკოლა – საქართველოს პრეზიდენტმა პაატა შეშელიძემ.მომავალი წლის ბიუჯეტის დეფიციტი იქნება მთავარი თემა, რომელსაც საერთაშორისო სავალუტო ფონდის წარმომადგენლები უახლოეს პერიოდში ხელისუფლების წევრებთან შეხვედრებზე განიხილავენ. „ჩვენ გვაქვს ძალიან სუსტი ეკონომიკა და არ გვაქვს საკმარისი ეკონომიკური ზრდა იმისთვის, რომ ჩვენი ეროვნული ვალუტა იყოს მყარი. ბიუჯეტი უნდა შემცირდეს, ხარჯვითი ნაწილი მთლიან შიდა პროდუქტთან აღარ უნდა იყოს იმდენი, რამდენიც გვაქვს დღეს. უნდა შემცირდეს ადმინისტრაციული ხარჯები. სავალუტო ფონდი შეწუხებულია იმითი, რომ თუ ეს შემცირება მან ვერ დაინახა, შეიძლება ბიუჯეტის დეფიციტი 6%-მდე გაიზრდოს,“ – აცხადებს ეკონომიკის ექსპერტი გიორგი პაპავა.ფონდის მისიის შეხვედრები თბილისში სავარაუდოდ, ორ კვირაში დაიწყება.