თბილისის მერიის გადაწყვეტილებით, სოციალურად დაუცველი ოჯახები კომუნალური გადასახადებისთვის გამოყოფილ 106 ლარს აღარ მიიღებენ. ოჯახებს აუნაზღაურდებათ უშუალოდ გაწეული ხარჯი და თანხა პირდაპირ კომპანიებს ჩაერიცხებათ. დედაქალაქის მთავრობას ამ პროექტზე 9 მილიონი ლარი უნდა დაეხარჯა.
ოპოზიცია ამტკიცებს, რომ ხელისუფლება ამ ცვლილებით წინასაარჩევნო ხარჯების გამო წარმოქმნილი დანაკლისის ანაზღაურებას გეგმავს. კიდევ ერთი პრობლემა ორ უწყებას შორის არაკოორდინირებული მუშაობაა, რის შედეგადაც ასობით ოჯახი კომუნალური მომსახურების გარეშე დარჩა.
კომუნალური სუბსიდირების პროგრამით სოციალურად დაუცველი ოჯახები 5 თვის განმავლობაში სარგებლობენ. წლების წინ მომზადებული წესი მერიამ შარშან შეცვალა და დახმარებას თბილისის ყველა მაცხოვრებელის ნაცვლად, მხოლოდ სოციალურად დაუცველთა ბაზაში რეგისტრირებულებს აძლევენ.