დღეს ზუგდიდის რაიონის სოფელ ჯიხაშკარისა  და განმუხურის საარჩევნო უბნებზე  განმეორებითი კენჭისყრა მიმდინარეობს. ამ დროისათვის სამივე უბანზე ხმის მიცემის უფლებით უკვე ისარგებლეს პირველმა ამომრჩევლებმა , თუმცა ჯიხაშკარში ტექნიკური პრობლემების გამო ( გაითიშა ელექტროენერგია) ხმის მიცემის პროცედურა  10 წუთის დაგვიანებით დაიწყო. საუბნო საარჩევნო კომისიამ ყველა პროცედურა, რომელიც წინ უძღვის ხმის მიცემის დაწყებას, სანთლის შუქზე ჩაატარა. 

 

განმუხურისა და ჯიხაშკარის უბნებზე 2400-ზე მეტი ამომრჩეველია, რაც შეეხება კანიდიდატებს, ამომრჩეველმა არჩევანი 6 კანდიდატს შორის უნდა გააკეთოს, ხოლო გამგებლის შემთხვევაში 4 კანდიდატს შორის.

8 ოქტომბერს, ჯიხაშკარში ორივე საარჩევნო უბანზე არჩევნების ღამეს უბნის დარბევა მოხდა და ამის გამო არჩევნები ჩაიშალა. განმუხურის 38-ე საარჩევნო უბანზე კი, უბნის თავმჯდომარემ ხმების დათვლის დროს უბანი დატოვა, შემდეგ დაბრუნდა და ხმები დაითვალეს, თუმცა საბოლოოდ, 67-ე საოლქო საარჩევნო კომისიამ აღნიშნული უბნის შედეგები ბათილად ცნო.

სწორედ ამ გარემოებების გამო გახდა საჭირო ორივე სოფელში განმეორებითი არჩევნების ჩატარება როგორც ჯიხაშკარის 79-ე და 108-ე უბნებზე, ისე განმუხურის 38-ე საარჩევნო უბანზე.