შოთა მესხიას ზუგდიდის სასწავლო უნივერსიტეტი ახალი დუალური პროფესიული პროგრამის განხორციელებას იწყებს. მსმენელები პრაქტიკულ სწავლებას ზუგდიდის ბოტანიკური ბაღის ბაზაზე გაივლიან. დეკორატიული მებაღეობის პროგრამის მიზანია, მებაღეობის სფეროსთვის მოამზადოს კონკურენტუნარიანი კადრები, რომლებიც მებაღეობის ტექნოლოგიებსა და მენეჯმენტს, მეყვავილეობას, სასათბურე მეთოდებს, სანერგეების მართვას და ლანდშაფტის მებაღეობას შეისწავლიან. პროგრამის პრეზენტაციას ყველა დაინტერესებული მხარე დაესწრო.
პროფესიული საგანმანათლებლო პროგრამის კურსდამთავრებულის დასაქმების სფეროებია – ბოტანიკური ბაღი, ქალაქის გამწვანებისა და კეთილმოწყობის სამსახური, პარკები, სკვერები, დეკორატიული მცენარეების სანერგე მეურნეობები, დახურული გრუნტისა და სასათბურე მეურნეობა, სამშენებლო კომპანია, დიზაინერული პროფილის ოფისები და სხვა.