ზუგდიდის დემოკრატიული ჩართულობის ცენტრში, ზუგდიდის მუნიციპალიტეტში არსებულ პრობლემურ საკითხებთან დაკავშირებით, საკონსულტაციო შეხვედრა ჩატარდა. შეხვედრაზე არასამთავრობო ორგანიზაციების, სამოქალაქო აქტივისტებისა და საზოგადოებრივი ჯგუფების წევრები იმ პრიორიტეტულ საკითხებზე მსჯელობდნენ, რომლის ასახვასაც 2020 წლის ბიუჯეტში ითხოვენ.
ადგილობრივი თვითმმართველობის მიერ მომზადებული 2020 წლის ბიუჯეტი 15 ნოემბერს საკანონმდებლო ორგანოს წარედგინება. დემოკრატიული ჩართულობის ცენტრის ზუგდიდის ოფისის ხელმძღვანელის ეკა მინჯორაიას განმარტებით, ამ ტიპის შეხვედრების მიზანია, საბიუჯეტო პროცესის ხელშეწყობა და მოსახლეობის საჭიროებებიდან გამომდინარე, ბიუჯეტის დაგეგმვაში გარვეული წვლილის შეტანა.
„საერთაშორისო გამჭირვალობა-საქართველოს“, – ზუგდიდის ოფისის ხელმძღვანელის, არჩილ თოდუას თქმით, მნიშვნელოვანია, რომ ბიუჯეტში აისახოს ყველა ის საჭიროებები, რაც დღეს მოსახლეობას აწუხებს. როგორც იგი დასძენს, მოსახლეობა ძირითადად ითხოვს მუნიციპალიტეტში სხვადასხვა ინფრასტრუქტურული პროექტების განხორციელებას.
არჩილ თოდუას თქმით, გასულ წლებთან შედარებით ბიუჯეტის დაგეგმვის პროცესის დროს უფრო მეტად არის მოსახლეობის ინტერესები გათვალისწინებული.