გერმანიაში ზელიმხან ხანგოშვილი მოკლეს. ამ ინფორმაციას პანკისის ხეობის მოსახლეობაც ადასტურებს.
მათი თქმით, ზელიმხან ხანგოშვილის ნათესავები დაუკავშირდნენ მის მეგობრებს, რომლებიც ამ დროისთვის ავსტრიის ერთ-ერთ ქალაქში იმყოფებიან და საქმის გასარკვევად გერმანიაში მიდიან. სწორედ მათგან იციან დუისელებმა დეტალები, რომელიც ამ მკვლელობას უკავშირდება.
გარემოცვის ინფორმაციით, ხანგოშვილი მკვლელობის მომენტში გერმანიაში მარტო იმყოფებოდა. ის ცეცხლსასროლი იარაღით არის მოკლული და ტყვია სავარაუდოდ, თავის არეში აქვს მოხვედრილი.
მათივე ინფორმაციით, ზელიმხან ხანგოშვილის მკვლელობისათვის, სავარაუდოდ, ერთი პირია დაკავებული.
ზელიმხან ხანგოშვილი პანკისის ხეობის სოფელ დუისში ცხოვრობდა. მას 2015 წელს თბილისში თავს დაესხნენ და რამდენიმე ტყვია ესროლეს,მკურნალობის შემდეგ მან ქვეყანა დატოვა. მედიაში გავრცელებული ინფორმაციით, ზელიმხან ხანგოშვილი ფიგურირებდა ლაფანყურის სპეცოპერაციაში.