საკრებულოს დღევანდელ სხდომაზე აზრთა სხვადასხვაობა და კამათი გამოიწვია ქალაქ ზუგდიდის მუნიციპალიტეტის ტერიტორიაზე გარე რეკლამის განთავსების ნებართვის გაცემის საკითხმა. აღნიშნული ინიცირებული პროექტის მომხსენებელი საკრებულოს იურიდიული კომისია იყო. უკმაყოფილება და კამათი გამოიწვია ფრაქცია „ერთიანი ნაციონალური მოძრაობის“ წევრის ანა წითლიძის ბრალდებამ. დეპუტატის განცხადებით, აღნიშნულ პროექტში კომპანია ვისოლისა და სოსო ფხაკაძის ინტერესები იკვეთება. საკრებულოს დღევანდელ სხდომაზე დეპუტატებმა უმრავლესობით აღნიშნული პროექტი დაამტკიცეს. გარე რეკლამის განთავსების ნებართვის გაცემის წესის დამტკიცების წინააღმდეგი მხოლოდ ანა წითლიძე იყო, ხოლო რაც შეეხება ბათლომე შელიას და თენგიზ ხარჩილავას – დეპუტატებმა თავი შეიკავეს. სხდომის შემდეგ ორივე მხრიდან კომენტარი გაკეთდა. ანა წითლიძის განცხადებით, 3 თვეა ქალაქ ზუგდიდის მერი ირაკლი გოგოხია საკრებულოზე ზეწოლას ახდებს, რომ გარე რეკლამის დადგებილება დაჩქარებულად მიიღონ. რაც შეეხება მერიის პოზიციას, ქალაქის მერის განცხადებით  აბსურდულ ბრალდებაზე კომენტარს არ გააკეთებს.საკრებულოს იურიდიული კომიტეტის თავმჯდომარე ამბობს, რომ გარე რეკლამირების უფლების მიღება აუქციონის წესით მოხდება, ხოლო ადგილები, სადაც უნდა განთავსდეს სარეკლამო ბანერები, დეპუტატის სიტყვებით,  ჯერჯერობით ამაზე საუბარი არ ყოფილა.საკრებულოს უმრავლესობის გადაწყვეტილებით, გარე რეკლამის განთავსების ნებართვის მოქმედების ვადა განისაზღვრება არანაკლებ 1 წლისა და არაუმეტეს 5 წლის ვადით. გარე რეკლამის განთავსების ნებართვის მოქმედების კონკრეტული ვადა განისაზღვრება გარე რეკლამის ნებართვის გაცემის შესახებ აუქციონის გამოცხადების თაობაზე გამოცემული სამართლებრივი აქტით.