„ქიბარ ხალვაშმა გადაწყვიტა, რომ არხი არ გაკოტრდეს, ის იყოს წარმატებული და მაქსიმალურად კრიტიკული ტელეკომპანია,“ – ამის შესახებ „რუსთავი 2“-ის გენერალურმა დირექტორმა პაატა სალიამ პრესკონფერენციაზე განაცხადა.
მისივე თქმით, არხის ხელმძღვანელობა ტელეკომპანიის სამოქმედო გეგმასთან დაკავშირებით ინფორმაციას საზოგადოებას მიაწვდის. ამასთან, პაატა სალიას ინფორმაციით, მიმდინარეობს ტელეკომპანიის ვალის რესტრუქტურიზაციაზე მუშაობაც.
„მოგეხსენებათ, ახლა არის მომდევნო სეზონისთვის მზადების პერიოდი. ძალიან ცოტა დროა დარჩენილი ახალი სატელევიზიო სეზონის დასაწყებად. სწორედ ამიტომ, თუ იქნებოდა ცვლილებები, ჩვენ მესაკუთრის ცვლილება უნდა მოგვეხდინა იმგვარად, რომ ხელი არ შეშლოდა არხის ნორმალურ ფუნქციონირებას. ეს ვადა უშედეგოდ გავიდა და ქიბარ ხალვაშმა გადაწყვიტა, რომ არხი არ გაკოტრდეს, ის იყოს წარმატებული და მაქსიმალურად კრიტიკული ტელეკომპანია.
ამ მოკლე ვადაში დავსახეთ კონკრეტული ამოცანები და გეგმები. სამოქმედო გეგმის შესახებ აუცილებლად გავესაუბრებით საზოგადოებას, რა თქმა უნდა იმ ფარგლებში, რა ფარგლებშიც შესაძლებელი იქნება კომპანიის ინტერესებიდან გამომდინარე. ცხადია, კონფიდენციალურ ინფორმაციას ვერ გავთქვამთ. ასევე, სახელმწიფოსთან ვმუშაობთ ვალის რესტრუქტურიზაციის თაობაზე. უფრო აქტიურად ვიმუშავებთ კრედიტორებთან. მოგეხსენებათ, 70 მილიონზე მეტია დავალიანება, როგორც ბიუჯეტის, ასევე სხვა კრედიტორების მიმართ. ანუ სამუშაო ძალიან დიდი გვაქვს, თუმცა დარწმუნებული ვარ, ამ ამოცანას აუცილებლად გადავლახავთ,“ – განაცხადა პაატა სალიამ