გუგუთიანკარში პოლიცია ადგილობრივ მოსახლეობას ჟურნალისტებთან საუბარს უკრძალავს. გუგუთიანთკარის პერიმეტრს, რომელსაც ისევ რუსი ოკუპანტები აკონტროლებენ, მოსახლეობას გადაადგილება 6 აგვისტოს შემდეგ არ შეუძლიათ.

მოსახლეობის თქმით, სამართალდამცავებმა მათ რუსი ოკუპანტების მიერ დაწყებულ სამუშაოებზე საუბარი აუკრძალეს და არანაირი ახსნა-განმარტება არ გააკეთეს. ადგილობრივების განცხადებით, სამართალდამცავები მათ ეუბნებიან, რომ მცოცავ ოკუპაციაზე ჟურნალისტებთან საუბარი არ შეიძლება.

მოსახლეობა ამბობს, რომ აღნიშნულ ტერიტორიაზე შესვლას ამჟამად ვერ ახერხებენ, 7 აგვისტომდე კი თავისუფლად გადაადგილდებოდნენ. მოსახლეობას საკუთარ მიწის ნაკვეთებთან მიახლოების უფლება არ აქვთ.

„100 მეტრზე ქვევითაა, უნდა გადმოწიონ და რა იქნება დანარჩენი არ ვიცი. სამუშაოები 7 აგვისტოს დაიყო… რა უნდა გავაკეთო, არაფერი, როგორ გადაწყვეტენ თვითონ რუსეთის და სამხრეთ ოსეთის უფროსები, ასე იქნება, დანარჩენი არ ვიცით ჩვენ,“ – ამბობს ადგილობრივი.

რუსი სამხედროების მიერ უკანონო ბორდერიზაცია გრძელდება – გუგუთიანთკარში საოკუპაციო ძალების მიერ ხელოვნური ბარიერების აღმართვის შემდეგ, ადგილობრივები უკვე მავთულხლართების გავლებას ელოდებიან. ადგილზე მონიტორინგის მიზნით, ანტისაოკუპაციო მოძრაობის წევრები პატრულირებენ. ტერიტორიაზე არიან პოლიციის თანამშრომლებიც.