ქართველი ჯარისკაცების ავღანეთში  გაცლების ცერემონიაზე საქართველოს თავდაცვის მინისტრმა,სიტყვით მიმართა სამხედროებს: „დღეს ჩვენთვის ერთ-ერთი ემოციური წუთებია. ასევე ემოციური წუთებია თქვენი ოჯახებისთვის, თქვენი მეგობრებისთვის და თქვენი პარტნიორებისთვის. ჩვენ ვართ ერთი გუნდი, საერთო განწყობებით, საერთო სიხარულით, ტკივილით და რაც მთავარია, საერთო ღირებულებებით. ჩვენი და ჩვენი შვილების თავისუფლებისთვის, უსაფრთხოებისთვის და ღირსებისთვის ჩვენ ვდგავართ როგორც ჩვენი ქვეყნის ფარგლებში სამშობლოს სადარაჯოზე, ისე მის ფარგლებს გარეთ, საერთაშორისო მისიებში. ყველა ქართველს აქვს განსაკუთრებული დამოკიდებულება და პატივისცემა იმ საპასუხისმგებლო მისიის მიმართ, რომელიც თქვენ ავღანეთში უნდა განახორციელოთ. ჩვენ სამაგალითო ვართ თანამშრომლობის იმ მაღალი ხარისხით და პარტნიორობით, რომელსაც ავღანეთში ვიჩენთ. მე თავად ვიხილე, რა გამორჩეულები ვართ ქართველები და ყველანი ვამაყობთ თქვენით. დარწმუნებული ვარ, რომ ამ ტრადიციებს თქვენც გააგრძელებთ ავღანეთში“, – განაცხადა იზორიამ.თავდაცვის მინისტრმა მადლობა გადაუხადა სამხედროების ოჯახებს თანადგომისთვის და თანაბრძოლისთვის.  „თქვენ აგრძელებთ ჩვენი გენის მებრძოლ სულისკვეთებას და ჩვენ თქვენს ოჯახებთან და პარტნიორებთან ერთად ვლოცულობთ, რომ მშვიდობით დაუბრუნდეთ ჩვენს სამშობლოს“, – მიმართა იზორიამ ქართველ სამხედროებს.