საფეხბურთო კლუბ ფოთის ,,კოლხეთი 1913“-ს გუშინ დღის ბოლომდე უნდა დაეფარა გასულ სეზონში მოასპარეზე ფეხბურთელების სახელფასო დავალიანება, საუბარია 45 ათას ლარზე, წინააღმდეგ შემთხვევაში, შესაბამისი სპორტულ-ტექნიკური კომისია აამოქმედებდა სანქციას და გუნდს ექვსი ქულა დააკლდებოდა.

გუნდმა დავალიანება დათქმულ დროს ვერ გადაიხადა და დიდი ალბათობით, ფოთის ,,კოლხეთი 1913“-ს 6 ქულა მოაკლდება, რაც ფედერაციის სადისციპლინო კომიტეტის გადასაწყვეტია

გუშინ ადგილობრივ ხელისუფებაში აცხადებდნენ, რომ პრობლემის მოგვარების მიზნით თანხების მოძიება მიმდინარეობდა, თუმცა შედეგი არ ჩანს, და დრეს მერიაში კომენტარსაც არ აკეთებენ.

როგორც ჟურნალისტებს საფეხბურთო კლუბ ,,კოლხეთი 1913“-ის დირექტორმა ზაზა ინაშვილმა განუცხადა, გუშინ გუნდს თანხები შემოწირეს, მაგრამ ,, სპონსორული შემოწირულობები მიზერულია და არანაირ დავალიანებას არ ყოფნის.”

,, მე ახალი დანიშნული დირექტორი ვარ, ჩემდა სამწუხაროდ, ვერანაირად დავეხმარე გუნდს და უახლოეს მომავალში მივიღებ გადაწყვეტილებას დავრჩები თუ არა გუნდში ამ პოზიციაზე“,- განაცხადა ზაზა ინაშვილმა.

ამჟამად ფოთის ,,კოლხეთი 1913“ მეორე ლიგაში მე-8 ადგილზეა , დავალიანების გადაუხდელობამ შესაძლოა სატურნირო ცხრილში მათი მდგომარეობა გააუარესოს.