მარნეულის სოფელ სადახლოში ქორწილში მოწამლულთა რაოდენობა 200-მდე გაიზარდა – საავადმყოფოში ინტოქსიკაციის ნიშნებით კიდევ 50-მდე პირი მიიყვანეს.
მოწამლულებიდან 28 მცირეწლოვანი ბავშვია, მათგან 21 ამ დრომდე საავადმყოფოებში რჩება. მოწამლულები მარნეულის ორ, ასევე რუსთავის, ბოლნისისა და თბილისის კლინიკებში არიან გადანაწილებულები.
ამ დროისთვის პაციენტების ჯანმრთელობის მდგომარეობა სტაბილურია.
წინასწარი ინფორმაციით, სადახლოში ქორწილში მყოფი მოქალაქეები ხორცით ან გამაგრილებელი სასმელით მოიწამლნენ. მომხდარზე გამოძიება დაწყებულია.
წუხელ გვიან ღამით მოწამლულები მარნეულში პრემიერ-მინისტრმა გიორგი კვირიკაშვილმა, ჯანდაცვის მინისტრის მოადგილემ და ქვემო ქართლის გუბერნატორმა მოინახულეს.