საპატრულო პოლიციამ პოლიტიკური ორგანიზაცია "სამოქალაქო ალიანსი საქართველოსთვის" ხელმძღვანელი ზურაბ ხარატიშვილი დააკავა იმ დროს, როცა იგი თბილისის მერიის სიახლოვეს მდებარე შენობის დროებით ზღუდეზე აკრავდა პლაკატებს მოთხოვნით ,,გადადგეს თბილისის მერი დავით ნარმანია!''
პატრულმა ხარატიშვილი თავდაპირველად ადმინისტრაციული სამართალდარღვევის მიზეზით 50 ლარით დააჯარიმა, მაგრამ როცა აქციის მონაწილეებთან ერთად მას შელაპარაკება მოუვიდა ჯარიმის დაკისრების დაუსაბუთებლობასთან დაკავშირებით, დაუმორჩილებლობის მომიზეზებით დააკავეს და შსს-ში გადაიყვანეს.
აქციის მონაწილეები – დღეს დაწყებული სამოქალაქო მოძრაობა „ალტერნატიული მერიის'' წარმომადგენლები მომხდარს "პოლიტიკურ დაკვეთას" უწოდებენ და ამტკიცებენ, რომ მათ პლაკატების გაკვრის უფლება ჰქონდათ.
ხარატიშვილის ადვოკატის განცხადებით მას სავარაუდოდ რამდენიმე საათში გაათავისუფლებენ.