სიონის ღვთისმშობლის მიძინების სახელობის ტაძარში სადღესასწაულო ლიტურგია სრულდება. წირვას სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე წმინდა სინოდის მღვდელთმთავრებსა და ტაძრის მღვდელმსახურებთან ერთად ასრულებს.
პატრიარქისთვის ანგელოზის დღის მისალოცად ტაძარში მთავრობის წევრები – საგარეო საქმეთა, ფინანსთა, ეკონომიკის, სოფლის მეურნეობის, ჯანდაცვის, დევნილთა, სპორტისა და გარემოს დაცვის მინისტრები, ასევე „ქართული ოცნების“ მაჟორიტარობის კანდიდატი არჩილ თალაკვაძე და თბილისის საკრებულოს თავმჯდომარე გიორგი ალიბეგაშვილი იმყოფებიან.
ტაძარში საქართველოს პრემიერ-მინისტრ გიორგი კვირიკაშვილს ელოდებიან.
ლიტურღიის დასრულების შემდეგ სრულიად საქართველოს კათოლიკოს-პატრიარქი მრევლს დღევანდელ დღეს მიულოცავს და ტრადიციული ქადაგებით მიმართავს.
დღეს სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ანგელოზის დღეა. მართლმადიდებელი ეკლესია დღეს წინასწარმეტყველის ილია თეზბიტელის და ილია მართლის (ჭავჭავაძე) ხსენების დღეს აღნიშნავს. ამასთან დაკავშირებით ტაძრებში წირვა-ლოცვა შესრულდება.