პრემიერმინისტრმა რესპუბლიკელი მინისტრების შემცვლელები წარადგინა. თავდაცვის მინისტრის პოსტს თინა ხიდაშელის ნაცვლად ლევან იზორია დაიკავებს. რაც შეეხება სახელმწიფო მინისტრს შერიგებისა და სამოქალაქო თანასწორობის საკითხებში, პაატა ზაქარეიშვილს, მას ქეთევან ციხელაშვილი ჩაანაცვლებს.
თავდაცვის ახალი მინისტრი ლევან იზორია ამ დრომდე სახელმწიფო უსაფრთხოების სამსახურის უფროსის მოადგილე იყო. მას აქვს იურიდიული განათლება და სამართლის მაგისტრისა და დოქტორის ხარისხებს ფლობს.
რაც შეეხება ქეთევან ციხელაშვილს ის შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილის პოსტს 2012 წლიდან იკავებდა.
შეგახსენებთ, რომ თინა ხიდაშელმა და პაატა ზაქარეიშვილმა თანამდებობები ოფიციალურად დღეიდან დატოვეს. მათი პოსტიდან წასვლა წინასაარჩევნო კამპანიაში ჩართვას უკავშირდება.