წუხელ ერევანში ხელისუფლებამ დაარბია პოლიციის განყოფილების შენობაში გამაგრებული შეიარაღებული ჯგუფის მხარდამჭერთა მშვიდობიანი დემონსტრაცია. დემონსტრანტებმა წინააღმდეგობა გაუწიეს ძალოვანთა ქმედებებს, რაც მათ შორის ფიზიკურ დაპირისპირებაში გადაიზარდა.
„ბიბისი“ სომხეთის პოლიციის პრესსამსახურის უფროსის აშოტ აღარონიანის მიერ გავრცელებულ ინფორმაციაზე დაყრდნობით იტყობინება, რომ აქტივისტების ნაწილმა განყოფილების შენობაში შეღწევა სცადა. ამ დროს შენობაში გამაგრებული ჯგუფის წევრებმა სხვადასხვა მიმართულებით ცეცხლი გახსნეს, რის შედეგადაც ერთი პოლიციელი დაიჭრა. სომხეთის ჯანდაცვის სამინისტრო იტყობინება, რომ შემთხვევის შედეგად დაშავებულია 4 სამართალდამცველი.
დარბევისასდემონსტრანტების მხრიდან სხვადასხვა სახის დაზიანებები მიიღო სამოცამდე ადამიანმა – ამ ინფორმაციას სომხეთის ჯანდაცვის სამინისტროს პრესსამსახური ავრცელებს.
ერევანში მდებარე პოლიციის განყოფილების შენობაში შეიარაღებული პირები 17 ივლისიდან იმყოფებიან. ისინი ოპოზიციონერი აქტივისტის, ჟირაირ სეფილიანის გათავისუფლებას, ასევე სომხეთის პრეზიდენტის გადადგომას ითხოვენ.