დღეს ამბასადორიალის ფარგლებში საქართველოს ტერიტორიული მთლიანობის აღდგენისა და სუვერენიტეტის განმტკიცების საკითხებზე იმსჯელეს.
დიპლომატებმა პარლამენტის ტერიტორიული მთლიანობის აღდგენის დროებითი კომისიის თავმჯდომარეს გიორგი ვოლსკის, შერიგებისა და სამოქალაქო თანასწორობის საკითხებში სახელმწიფო მინისტრის მოადგილეს ქეთევან ციხელაშვილს და სუს-ის უფროსის მოადგილეს ლევან იზორიას მოუსმინეს.
საქართველოს საგარეო საქმეთა მინისტრის მოადგილემ დავით დონდუამ განაცხადა, რომ ამ საკითხისადმი დიპლომატების ყურადღება მეტად მნიშვნელოვანია რამდენადაც , ორივე ოკუპირებულ ტერიტორიაზე და მათ მიმდებარე რეგიონებში უსაფრთხოების მხრივ სიტუაცია საგანგაშოა და მეტი ყურადღება არის საჭირო საერთაშორისო თანამეგობრობის მხრიდან იმისათვის, რომ ელემენტარული ადამიანის უფლებები დაცული იყოს.
მან პოზიტიურად შეაფასა გალში ინციდენტების პრევენციისა და მათზე რეაგირების მექანიზმის აღდგენა, რომლის ფარგლებშიც მომავალი კვირის განმავლობაში მესამე შეხვედრა გაიმართება. ,,ჩვენ ვისაუბრეთ ბოლო პერიოდში განხორციელებულ ნაბიჯებზე, რომელიც საქართველოს მთავრობამ და პარლამენტმა გადადგა კონფლიქტის მშვიდობიანი მოგვარების მიმართულებით. ვისაუბრეთ არსებულ მექანიზმებზე, კერძოდ, ჟენევის დისკუსიების მიმდინარეობაზე. აღინიშნა, რომ მართალია, ჟენევის მოლაპარაკებებში ჯერ კიდევ უგულვებელყოფილია მთავარი საკითხები, როგორიცაა რუსეთის მიერ ძალის არგამოყენების ვალდებულების აღება, ადგილზე უსაფრთხოების საერთაშორისო მექანიზმების შექმნა და დევნილთა დაბრუნების საკითხები, თუმცაღა ბოლო პერიოდში იყო გარკვეული პოზიტიური განვითარებები. რაუნდები უფრო დინამიკურად მიმდინარეობს, ადგილი არა აქვს ინტენსიურ ჩავარდნებს, საფრთხე არ ემუქრება ფორმატს“, – განაცხადა დონდუამ.