ახალქალაქის რაიონის სოფელ ვაჩიანის მცხოვრებლების ინფორმაციით, ქალისა და მისი სამი შვილის მკვლელობაში ეჭვმიტანილი, სავარაუდოდ, მათივე სოფლიდანაა. ამის შესახებ ადგილობრივმა, რომელმაც ვინაობის გასაჯაროება არ ისურვა, ჟურნალისტებს განუცხადა.„სოფელში გასვლაც კი გვეშინია. პოლიცია რამდენიმე ადგილას მუშაობს. სავარაუდოდ, მკვლელი ამ სოფლიდან არის და როგორც ვიცით, ჯერ კიდევ არ დაუჭერიათ. ეძებენ დამნაშავეს“, – აღნიშნა მან.ახალქალაქის რაიონის სოფელ ვაჩიანში 37 წლის ქალისა და მისი სამი შვილის ცხედრები იპოვეს. არსებული ინფორმაციით, ბავშვების ასაკი 5, 16 და 18 წელია. სახლში მხოლოდ ქალი და მისი შვილები ცხოვრობდნენ, ოჯახის უფროსი კი რუსეთში სამუშაოდ იმყოფება. მომხდარის მიზეზები ჯერჯერობით უცნობია. ცხედრები ნინოწმინდის რაიონული ექსპერტიზის ბიუროში გადაასვენეს, სადაც გვამებს ექსპერტიზა ჩაუტარდათ.წინასწარი ინფორმაციით, შემთხვევა 2 დღის წინ მოხდა, ცხედრები მეზობლებმა გუშინ შემთხვევით აღმოაჩინეს. დედასა და უფროს გოგონებს, სავარაუდოდ, თავის არეში აქვთ ბლაგვი საგნით სასიკვდილო ჭრილობები მიყენებული. უმცროსი, 5 წლის ბიჭი კი გაგუდულია. მთელი ღამის განმავლობაში ადგილზე ექსპერტ-კრიმინალისტები მუშაობდნენ. მომხდარის შესახებ სხვა ინფორმაცია ამ ეტაპზე არ ვრცელდება.
წყარო : ინტერპრესნიუსი