ფოთში საკონტეინერო ტერმინალების თანამშრომელთა მიერ დღეისათვის დაანონსებული აქცია არ ჩატარდა.
ბრიფინგზე, რომელიც გადამზიდავი კომპანიების წარმომადგენლებმა გამართეს, ცნობილი გახდა, რომ აქციის სჭიროება მოიხსნა, რადგან სასამართლომ დააკმაყოფილა კონკურენციის სააგენტოს მიმართვა და შეაჩერა ფოთის პორტის გადაწყვეტილება, რომელიც პირველი ივლისიდან ძალაში უნდა შესულიყო და გულისხმობდა ნავსადგურის მიერ კონტეინერების ინტეგრირებულ მართვას. იმ შემთხვევაში, თუ გადაწყვეტილება ამოქმედდებოდა, ფოთის საკონტეინერო ტერმინალები უფუნქციოდ, 5 ათასამდე ადამიანი კი უმუშევარი რჩებოდა და სწორედ ამის გაპროტესტება იგეგმებოდა კიდევ ერთხელ დღეს.
„ეს ერთ-ერთი გამარჯვებაა, როდესაც ბიზნესი და დასაქმებული ადამიანები ერთად იღებენ გადაწყვეტილებას. მივიღეთ ლოგიკური გადაწყვეტილება, უმუშევრობა აღარ ემუქრება 5 ათას ადამიანს“-განაცხადა საქართველოს სატრანსპორტო პროფკავშირის პრეზიდენტმა ლავრენტი ალანიამ.