ეროსი კიწმარიშვილის ადვოკატი და ოჯახი გამოძიების შედეგებთან დაკავშირებით დღეს საგანგებო ბრიფინგს გამართავს. ისინი მკვლელობაზე საუბრობენ და არ იზიარებენ თვითმკვლელობის ვერსიას.
ერთ-ერთი მთავარი კითხვა მათ იარაღთან დაკავშირებით აქვთ. ადვოკატის განცხადებით, პროკურატურას დნმ-ის კვალის იდენტიფიცირებისთვის საქმის მასალების მიხედვით, არც ერთი საგამოძიებო მოქმედება არ ჩაუტარებია.
ოჯახისთვის ასევე არადამაჯერებელია პროკურატურის მიერ დასახელებული თვითმკვლელობის მოტივი. გამოძიება ერთადერთ ვერსიად ვალს და ფინანსურ პრობლემებს ასახელებს.
"ვთვლით, რომ იქ არც ერთი მტკიცებულება არ იყო წარმოდგენილი. ის, რომ მომაკვდინებელ იარაღზე არის უცხო პირის დნმ, ეს იმდენად მნიშვნელოვანი საკითხია, რომ ასეთი პასუხი, ალბათ შემოტანისას ვიღაცამ ხელი მოკიდა, მე პირადად არ მაკმაყოფილებს. პროკურატურა თვლის, რომ ეს იყო თვითმკვლელობა, მე ვფიქრობ, რომ ეს იყო შეკვეთით ჩადენილი მკვლელობა," – განაცხადა ზურა კიწმარიშვილმა.
კითხვები აქვს გამოძიებასთან კიწმარიშვილების ოჯახის ადვოკატსაც.