ფინანსთა მინისტრმა ნოდარ ხადურმა განაცხადა, რომ მომხდარის გამო მთავრობამ შეაჩერა პარლამენტში ბიუჯეტის პროექტის წარდგენა, ,,რათა მისი რეალობასთან მორგება მოხდეს''.
მან განმარტა, რომ ეს განპირობებულია აუცილებლობით ბიუჯეტში გათვალისწინებულ იქნას სტიქიის შედეგად თბილისისთვის მიყენებული ზარალის სალიკვიდაციო სამუშაოებისთვის საჭირო თანხების ასახვა. ,,ზარალი ძალიან დიდია. სალიკვიდაციო სამუშაოებს ალბათ 100 000 000 ლარიც არ ეყოფა. მხოლოდ ზოოპარკთან მიმართებითაც კი მთავრობას რამდენიმე ათეული მილიონი ლარი დასჭირდება. გუშინ საღამოს მონაცემებით სახელმწიფო ხაზინაში და კომერციულ ბანკებში მობილიზებულია დაახლოებით 17 მილიონი ლარი, აქედან 10 მილიონი საქართველოს მთავრობამ გამოყო სარეზერვო ფონდიდან , თუმცა ცხადია, ეს არ არის საკმარისი თანხა. ჩვენ შევეცდებით შექმნილი ვითარება გავითვალისწინოთ – აღნიშნა ფინანსთა მინისტრმა.