საქართველოს მთავრობის რეაქცია აფხაზეთში ConIFA -ს (დამოუკიდებელი საფეხბურთო ასოციაციების კონფედერაციის) ეგიდით მიმდინარე საფეხბურთო ჩემპიონატის საკითხზე , საკმაოდ მშვიდია – ასეც იყო მოსალოდნელი ფეხბურთის ფედერაციის მიერ ჯერ კიდევ შარშან, დეკემბერში გაკეთებული განცხადების შემდეგ სოხუმში ConIFA-წარმომადგენლების ჩამოსვლასთან დაკავშირებით – ,,ითამაშონ, თუ ასე ძალიან უნდათ, ეს არაღიარებული ქვეყნების არაღიარებული ჩემპიონატია და ბევრს არაფერს ნიშნავს.'' – ნათქვამი იყო განცხადებაში.
ეს განცხადება გაკეთდა საქართველოს საგარეო საქმეთა სამინისტროსადმი აფხაზეთის ლეგიგტიმური მთავრობის მიმართვის პასუხად, რომელშიც ნათქვამი იყო, რომ ,,საჭიროა მივმართოთ საერთაშორისო თანამეგობრობას და ყველა დიპლომატიური არხით გავავრცელოთ ინფორმაცია სოხუმში ჩემპიონატის ჩატარების მიმართ ჩვენი უარყოფითი პოზიციის შესახებ.
კვლავ უცნაური განცხადება გაკეთდა სამიოდ დღის წინათ – მასში სიტყვასიტყვით იყო ნათქვამი, რომ თუ ეს ფაქტი დადასტურდა, საქართვდელო ადექვატურ რეაქციას დააფიქსირებს. და ეს მაშინ, როცა ამ დროისათვის სოხუმში ჩამოსული იყო ჩემპიონატის ყველა მონაწილე და მიდიოდა ჩემპიონატის გახსნის საზეიმო ცერემონიალის გენერალური ფრეპეტიცია ქალაქის მთავარ სტადიონზე. ასეა თუ ისე, ჩემპიონატი აფხაზეთში უკვე ფაქტს წარმოადგენს, მსოფლიო ჩემპიონატი-2016 სოხუმის დინამოს სტადიონზე 28 მაისს, ღამით საზეიმოდ გაიხსნა. მას დე ფაქტო რესდპუბლიკის პრეზიდენტი რაულ ხაჯიმბაც დაესწრო.
„ჩვენი ერი არის ჩვენი სული, რომელმაც შექმნა დამოუკიდებელი სახელმწიფო. ვერავინ შეძლებს ჩვენს იზოლირებას საერთაშორისო ურთიერთობებში. აფხაზეთი სტუმართმოყვარე და ღია ქვეყანაა. ყველას მშვიდობას და წარმატებებს გისურვებთ“, – განაცხადა გახსნის ცერემონიალზე რაულ ხაჯიმბამ.
სააგენტო „აფსნიპრესის“ ცნობით, აფხაზეთში მიმდინარე ჩემპიონატში მონაწილეობას იღებს 12 გუნდი, მათ შორის აფხაზეთის, სამხრეთ ოსეთის დე ფაქტო რესპუბლიკების, ასირიის, რეციის, ნიცეს საგრაფოს, ფრანკონიის, ზანზიბარის, სომალილენდის, ჩრდილოეთ კვიპროსის და სხვა არაღიარებული ქვეყნების საფეხბურთო გუნდები. ჩემპიონატის ფარგლებში , უკვე გაიმართა რამდენიმე საფეხბურთო მატჩი, გუშინ აფხაზეთის გუნდმა გამანადგურებელი ანგარიშით 9:0 დაამარცხა ჩაგოსის კუნძულების გუნდი ( ჩაგოსი დიდ ბრიტანეთს ეკუთვნის, მაგრამ მასზე პრეტენზიებს მავრიკია აცხადებს) .
ჩემპიონატი სოხუმში 5 ივნისს ასევე საზეიმო ვითარებაში დაიხურება.
ცნობისათვის : ConIFA აცხადებს, რომ იგი აერთიანებს მსოფლიო სპორტისგან იზოლაციაში მყოფ არაღიარებულ ქვეყნებს, რეგიონებს, ერებს და უმცირესობებს; საფეხბურთო გუნდებს, რომლებიც არ შედიან FIFA-ს მფარველობის ქვეშ.