დღეს, 29 მაისს სამეგრელოში მიმდინარე დიპლომატიური ტური ანაკლიის ღრმაწყლოვანი პორტის მშენებლობისთვის განკუთვნილი ტერიტორიის დათვალიერებით გაგრძელდა. დღესვე ტურის მონაწილე საქართველოში აკრედიტებული დიპლომატიური კორპუსის წარმომადგენლები ესტუმრნენ საწარმოს, რომელიც "აწარმოე საქართველოში" პროგრამის ფარგლებშია ამოქმედებული.
უკვე მეორე დღეა დიპლომატები სამეგრელო-ზემო სვანეთის ეკონომიკურ პოტენციალს და რეგიონში განხორციელებულ პროექტებს ეცნობიან. ანაკლიაში მათთვის გაიმართა შეხვედრა– პრეზენტაცია, რომელზედაც მიეწოდათ შესაბამისი ინფორმაცია რეგიონული პროექტების კოორდინირების სამსახურის უფროსის დავით კოდუას მიერ.
შეხვედრაზე დიპლომატიური კორპუსის წარმომადგენლებს სიტყვით მიმართეს საგარეო საქმეთა მინისტრმა მიხეილ ჯანელიძემ და მხარის გუბერნატორმა ლევან შონიამ.
შეგახსენებთ, ორმოცამდე ქვეყნის რეზიდენტი და არარეზიდენტი ელჩი იღებს მონაწილეობას საგარეო საქმეთა სამინისტროს მიერ ორგანიზებულ ღონისძიებაში "დიპლომატიური ტური – 2016". ტურის თანაორგანიზატორები არიან საქართველოს ეკონომიკისა და მდგრადი განვითარების სამინისტრო, საქართველოს კულტურისა და ძეგლთა დაცვის სამინისტრო, საქართველოს სოფლის მეურნეობის სამინისტრო, საქართველოს ტურიზმის ეროვნული ადმინისტრაცია, "საპარტნიორო ფონდი" და საქართველოს რკინიგზა და , რა თქმა უნდა, მაპინძელი – სამეგრელო-ზემო სვანეთის გუბერნატორის ადმინისტრაცია.