დეპუტატები დღეს მესამე მოსმენით განიხილავენ საარჩევნო კოდექსში შესატან ცვლილებას, რომლის თანახმად, პრემიერმინისტრს არჩევნებისთვის თანამდებობიდან გადადგომა აღარ მოუწევს, საბოლოო გადაწყვეტილებას ამ საკითხზე კანონმდებლები მომავალი კვირის სესიაზე მიიღებენ.
უმრავლესობა სიახლეს დამატებითი პრობლემების თავიდან აცილების გზად მოიხსენიებს, საპარლამენტო უმცირესობა კი მას გიორგი კვირიკაშვილზე მორგებულს უწოდებს. „ეს არის შეშინებული, პატარა კაცების მოფიქრებული საკანონმდებლო ინიციატივა,“- აცხადებენ საპარლამენტო უმცირესობაში.
საქართველოს საარჩევნო კოდექსის მიხედვით საქართველოს პარლამენტის წევრობის კანდიდატად რეგისტრაციის შესახებ შესაბამისი საარჩევნო კომისიისთვის განცხადების წარდგენიდან არაუგვიანეს მე-2 დღისა დაკავებული თანამდებობიდან უნდა გადადგნენ და განთავისუფლდნენ შემდეგი თანამდებობის პირები: საქართველოს, აგრეთვე ავტონომიური რესპუბლიკის მინისტრები, სამთავრობო და სახელმწიფო საქვეუწყებო დაწესებულებათა ხელმძღვანელები და მათი მოადგილეები; შესაბამისად ამ ჩამონათვალში იგულისხმება ქვეყნის პრემიერ მინისტრიც.
აღნიშნული სამართლებრივი ნორმიდან გამომდინარე გიორგი კვირიკაშვილის საარჩევნო სიაში შეყვანა ავტომატურად ნიშნავდა მის გადადგომას პრემიერ-მინისტრის პოსტიდან, თუმცა ქართული ოცნება თავისი საგრძნობლად დაცემული რეიტინგის პირობებში ცდილობს ნებისმიერი ხერხით შეინარჩუნოს იგი ამ პოსტზე, როგორც მოსახლეობის ნაწილში თითქმის ერთადერთი დადებითი იმიჯის მქონე ეს პოლიტიკოსი თავისი რიგებიდან. ვინაიდან არსებული ქართული საკანონმდებლო ბაზა ამის საშუალებას არ იძლევა , პარლამენტში განსახიველად შევიდა გია ვოლსკის, ზვიად ძიძიგურისა და ვახტანგ ხმალაძის მიერ ინიცირებული კანონპროექტი საარჩევნო კოდექსში განსახორციელებელი ცვლილებების შესახებ, რომლის მიღების შემთხვევაში პრემიერ-მინისტრს უფლება ეძლევა საარჩევნო სიაში ყოფნასთან ერთად თანამდებობაც შეინარჩუნოს. კანონპროექტის ავტორები ამ ნაბიჯის აუცილერბლობას იმით ხსნიან, რომ ქვეყანაში არსებულ დაძაბულ სიტუაციის ფონზე პრემიერ მინისტრის გადადგომამ შეიძლება კრიზისი გამოიწვიოს, ამასთან ეს მსოფლიოს ბევრ ქვეყანაშია აპრობირებული, როგორც კრიზისის ხელოვნურად გამოწვევის თავიდან აცილების საშუალება.