ზუგდიდის მუნიციპალიტეტის სოფელ ახალაბასთუმანიში, გამწმენდი ნაგებობის მიმდებარე ტერიტორიაზე, ე.წ "აჩისნოისთან" გარდაცვლილი მამაკაცის გვამი აღმოაჩინეს. ტერიტორია ოკუპირებულ აფხაზეთს ესაზღვრება. არსებული ინფორმაციით, ცხედარი სოფელ ჭკადუაშში მცხოვრებ აფხაზეთიდან დევნილს ეკუთვნის, რომელიც დაახლოებით 50 წლისაა. აღნიშნულ ტერიტორიაზე სამართალდამცავები და ექსპერტ-კრიმინალისტები მუშაობდნენ. ამ დროისთვის ცხედარი ქუთაისში, ლევან სამხარაულის სახელობის სასამართლო ექსპერტიზის ეროვნულ ბიუროშია გადასვენებული.
თვითმხილველთა ინფორმაციით, გარდაცვლილს თავის არეში სისხლი აღენიშნებოდა, თუმცა ნატყვიარი არ ჩანდა. როგორც ადგილობრივები აცხადებენ, შესაძლოა სიკვდილის გამომწვევი მიზეზი გულის შეტევა გახდა. მათთვის ასევე უცნობია, თუ რას აკეთებდა გარდაცვლილი პირი აღნიშნულ ტერიტორიაზე.
შსს პრესსამსახურის ინფორმაციით, მომხდარზე გამოძიება საქართველოს სისხლის სამართლის კოდექსის 115 -ე მუხლით მიმდინარეობს, რაც თვითმკვლელობამდე მიყვანას გულისხმობს.