ბიზნესზე ზეწოლა, პრობლემები სასამართლო სისტემაში – არასამთავრობო ორგანიზაციების წარმომადგენლები ბრიუსელში შეხვედრებს მართავენ.
შეხვედრის დროს არასამთავრობო ორგანიზაცია „საერთაშორისო გამჭვირვალობა – საქართველოს“ აღმასრულებელი დირექტორმა, ეკა გიგაურმა სასამართლო სისტემაში არსებულ პრობლემებზე ისაუბრა.
გიგაურმა გარდა ამისა, ასევე ისაუბრა, არასამთავრობო სექტორზე განხორციელებულ თავდასხმებზე და თქვა, რომ პასუხგაუცემელი კითხვები, უკავშირდება ივანიშვილის სახელს.
„ნამდვილად არ მიხარია ელიტურ კორუფციაზე საუბარი, რომელიც ჩემს ქვეყანაში არსებობს. ეს არის მუდმივად მზარდი პრობლემა. ჩვენ გვქონდა ეს წინა ადმინისტრაციის დროსაც, მაგრამ ახლა უფრო შესამჩნევი გახდა. ჩვენ არ გვაქვს ძალაუფლების ბალანსის და მასზე კონტროლის ეფექტური მექანიზმი, არ გვაქვს დამოუკიდებელი ინსტიტუტები, არ არის დამოუკიდებელი სასამართლოც, ეს ფაქტორები ხელს ვერ უწყობს სიტუაციის გაუმჯობესებას და ახლა უფრო რთულია ელიტურ კორუფციასთან გამკლავება,“ – განაცხადა ეკა გიგაურმა.
ეკა გიგაურმა ელიტურ კორუფციაზე საუბრისას აღნიშნა, რომ ძალოვანი უწყებები დამოუკიდებლობას ვერ ინარჩუნებენ. გიგაურმა თიბისი ბანკის ირგვლივ განვითარებულ მოვლენებზე და ივანიშვილის ინტერესებზეც ისაუბრა.
„გვაქვს უამრავი მაგალითი, რომ ყოფილი მაღალჩინოსნები ჩართული არიან ელიტურ კორუფციაში და არცერთ საქმეზე გამოძიება არ დაწყებულა. გვაქვს იმის მაგალითებიც, როგორ ემსახურებიან დამოუკიდებელი ინსტიტუტები მთავრობის ინტერესებს. ასეთია, თიბისის საქმე – ივანიშვილი ჯერ აკრიტიკებს კონკრეტულ ადამიანს და ორგანიზაციას და შემდეგ კი იწყება პრობლემები,“ – განაცხადა გიგაურმა.
სულხან სალაძე კი ამბობს, რომ მოსახლეობაში სასამართლოსადმი ნდობა არ არის და მან დახმარება ევროპელ პარტნიორებს სთხოვა.
„დღეს სასამართლოს დამოუკიდებლობა არ იზომება პოზიტიური გადაწყვეტილებების მიღებით. მნიშვნელოვანია ის საქმეები, რომლებსაც პოლიტიკურად მგრძნობიარე ასპექტები გააჩნია. რა თქმა უნდა, ამ შემთხვევაში მთავრობას სურს, კონკრეტულ შედეგებს მიაღწიოს. მკაფიო მაგალითებია "რუსთავი 2"-ის საქმე, საყდრისის საქმე, კაბელების საქმე და სხვები, სია საკმაოდ გრძელია. ყველა ამ საქმეში სასამართლომ ისეთი გადაწყვეტილებები მიიღო, როგორიც მთავრობას სურდა. სოციალურ მედიაში დაიწყო კამპანია არასამთავრობო ორგანიზაციების და ზოგიერთი პარლამენტარის წინააღმდეგ,“ – განაცხადა სულხან სალაძემ