ზუგდიდის საოლქო პროკურორს მეოთხე დღეა ვერ პოულობენ. არსებული ინფორმაციით, პაატა ქირია სახლიდან გავიდა და უკან აღარ დაბრუნებულა. ორი დღის წინ პროკურორის მობილური ტელეფონი რუსთავში იპოვეს, თავად პროკურორს კი ვერსად ვერ პოულობენ. ამ დრომდე ნაპოვნი არ არის დაკარგულის პირადი ავტომობილი. მთავარ პროკურატურაში აცხადებენ, რომ საქმეში უწყება აქტიურადაა ჩართული და მიმდინარეობს მოკვლევა დაკარგული პროკურორის ადგილსამყოფელის დასადგენად.
აღნიშნულ ფაქტთან დაკავშირებით განცხადება ცოტა ხნის წინ პროკურატურის საზოგადოებასთან ურთიერთობის სამსახურის უფროსმა ნათია სუხიშვილმა გააკეთა. „სამეგრელო-ზემო სვანეთის საოლქო პროკურატურის განყოფილების უფროსი პროკურორი ვახტანგ ქირია ორი დღეა არ გამოცხადებულა სამსახურში და არც ოჯახთან არ გასულა კონტაქტზე. ამჟამად მიმდინარეობს აქტიური მოქმედებები მისი ადგილსამყოფელის დადგენის მიზნით,“ – განაცხადა ნათია სუხიშვილმა.
ფაქტთან დაკავშირებით ამ დრომდე კომენტარს არ აკეთებს დაკარგული პროკურორის ოჯახი და არც გაუჩინარების შესაძლო ვერსიებზე საუბრობს. თუმცა, ერთ-ერთი ვერსიით, მისი დაკარგვა სამსახურეობრივ საქმიანობას უკავშირდება. კერძოდ კი, ქირიას ოკუპირებულ აფხაზეთში მომხდარი დანაშაულები ებარა. ამასთან, ოთხი დღის წინ მას უცნობმა პირებმა დაურეკეს, იგი სახლიდან გავიდა, მან მობილურ ტელეფონს მხოლოდ ერთხელ უპასუხა, ხოლო შინ აღარ დაბრუნებულა.