ეროვნულ-დემოკრატიული ინსტიტუტის (NDI) კვლევის მიხედვით, მოსახლეობის 43% მიიჩნევს, რომ ბოლო 10 წელიწადში საქართველოში კრიმინალური მდგომარეობა გაუარესდა. 32%-ის აზრით, იგივე დარჩა, ხოლო 18%-ის აზრით, გაუმჯობესდა.

 

ამ კითხვაზე პასუხების დაახლოებით ერთნაირი მაჩვენებელია თბილისსა და დიდ ქალაქებში – თბილისში გამოკითხულთა 49% მიიჩნევს, რომ კრიმინალური მდგომარეობა გაუარესდა, ხოლო დიდ ქალაქებში 51%. პატარა ქალაქებში, სოფლებსა და უმცირესობათა დასახლებებში ეს მაჩვენებელი 42%, 39% და 32%-ია. ამასთან, მოსაზრებას, რომ საქართველოში კრიმინალური მდგომარეობა გაუმჯობესდა, ყველაზე მეტი ადამიანი ეთანხმება პატარა ქალაქებსა (24%) და უმცირესობათა დასახლებებში (22%).

 

ამასთან, გამოკითხულთა აზრით, ყველაზე ხშირია ნარკოტიკული დანაშაული (25%), ქურდობა-ძარცვა-ყაჩაღობა (21%) და ავტოსაგზაო შემთხვევები (20%). 14% მიიჩნევს, რომ ხშირია მკვლელობები, ხოლო 5%-ის აზრით, ოჯახში ძალადობა.

 

​ეროვნულ-დემოკრატიული ინსტიტუტის (NDI) კვლევის მიხედვით, მოსახლეობის 60% პოლიციის საქმიანობას დადებითად აფასებს, ხოლო 18% ცუდად. 3% მიიჩნევს, რომ საქართველოში პოლიციის საქმიანობა ძალიან ცუდია, 7%-ის აზრით კი, ძალიან კარგი. გამოკითხულთა 12% ამბობს, რომ არ იცის.

 

ყველაზე ცუდად პოლიციის საქმიანობას თბილისში აფასებენ (28%), ხოლო ყველაზე კარგად უმცირესობათა დასახლებებსა (73%) და პატარა ქალაქებში (72%).

 

ამასთან, გამოკითხულთა 94% ამბობს, რომ ბოლო 2 წლის განმავლობაში პოლიციისთვის არ მიუმართავს, ხოლო იმ 5%-დან, ვინც ამ პერიოდში პოლიციას მიმართა, უმეტესობა თავად იყო მსხვერპლი და რეაგირებითაც კმაყოფილია.

 

გარდა ამისა, გამოკითხულთა 41% კარგად აფასებს შინაგან საქმეთა სამინისტროს საქმიანობას, ხოლო 6% ძალიან კარგად. უწყების საქმიანობას ცუდად აფასებს 18%, 5% ძალიან ცუდად, 29%-მა კი არ იცის.

 

 

ეროვნულ-დემოკრატიულმა ინსტიტუტმა (NDI) კვლევა წარმომადგენლობითი შერჩევის წესით, მთელი საქართველოს მასშტაბით ჩაატარა, გარდა ოკუპირებული ტერიტორიებისა.

 

საველე სამუშაოები 6-20 დეკემბერს ჩატარდა. გამოიკითხა 2205 ადამიანი, ცდომილების საშუალო ზღვარი +/- 2%-ია.