ოკუპირებული აფხაზეთის შსს მინისტრმა ლეონიდ ძიაფშბამ თანამდებობიდან გადააყენა დრანდის ციხის უფროსი რუსლან ჯელია და ამ პოსტზე ციხეში შექმნილი მდგომარეობის შესწავლის პერიოდისთვის დროებით მილიციის პოლკოვნიკი თემურ შიკირბა დანიშნა.
ლაპარაკი დრანდის იზოლატორში არსებულ მდგომარეობაზე დიდი ხანია მიმდინარეობს, მაგრამ ამჯერად ჯელია ციხიდან გუშინ მომხდარ პატიმრის გაქცევის ფაქტს შეეწირა.
შეგახსენებთ, გუშინ დილით ციხიდან გაიქცა ბაჩუკი ლატარია, რომელიც ჭუბურხინჯში ჩადენილი დანაშაულისთვის, კერძოდ, გამოსასყიდის მიღების მიზნით ადამიანის გატაცებისთვის იყო მსჯავრდებული (აფხაზური მედიის ცნობით, ბაჩუკი ლატარია ხობის მკვიდრია).
გაქცეული პატიმარი გუშინვე იქნა დაკავებული სოფელ შაუმიანივკის მიმდებარე ტყეში, ხოლო იზოლატორის ხელმძღვანელებისა და იმ თანამშრომლების მიმართ, რომელნიც გაქცევის ღამეს მორიგეობდნენ, დაიწყო სამსახურებრივი მოკვლევა.