გავლენიანი გამოცემა The Economist-ი ავრცელებს სტატიას, სადაც დონალდ ტრამპის მიერ მხარდაჭერილ 28-პუნქტიან სამშვიდობო გეგმას აკრიტიკებს. გამოცემის შეფასებით, უკრაინაში ომის დასრულებისკენ მიმართული ეს ინიციატივა საფრთხეს უქმნის არა მხოლოდ უკრაინას, არამედ ევროპასა და უშუალოდ შეერთებულ შტატებსაც.

სტატიაში აღნიშნულია, რომ დოკუმენტი „იმდენად ცუდად არის შემუშავებული, იმდენად ბუნდოვანი, დაუბალანსებელი და არაპრაქტიკულია, რომ უფრო ნორმალურ სამყაროში ის ვერასოდეს იხილავდა მზის სინათლეს“. მიუხედავად ამისა, არსებული პოლიტიკური რეალობიდან გამომდინარე, სრულიად შესაძლებელი და ალბათურია, რომ აშშ-ის პრეზიდენტმა დონალდ ტრამპმა მადლიერების დღემდე მოითხოვოს ოფიციალური კიევისგან ამ გეგმის ან მისი მსგავსი ვარიანტის მიღება.

The Economist-ის ცნობით, იმ შემთხვევაში, თუ უკრაინის პრეზიდენტი ვოლოდიმირ ზელენსკი პირობების შესრულებაზე უარს იტყვის, შესაძლოა ტრამპმა უკრაინას გადაუკეტოს წვდომა ამერიკულ სადაზვერვო მონაცემებსა და თანამედროვე შეიარაღებაზე — ისევე, როგორც ეს მიმდინარე წლის დასაწყისში მოხდა, რასაც ფრონტზე დამანგრეველი შედეგები მოჰყვა.

რა შეზღუდვებსა და პირობებს ითვალისწინებს გეგმა:

უთანაბრო შეზღუდვები: გეგმის მიხედვით, უკრაინას ეკრძალება რაკეტების გაშვება მოსკოვისა და სანქტ-პეტერბურგის მიმართულებით, თუმცა რუსეთის მხრიდან დარტყმებზე არანაირი შეზღუდვა არ წესდება.

არმიის შემცირება: დოკუმენტი მოითხოვს უკრაინის შეიარაღებული ძალების შემცირებას 600 000 ჯარისკაცამდე, მაშინ როცა რუსეთის არმიის ზომასა და შეიარაღებაზე ლიმიტები არ დაწესებულა.

უსაფრთხოება და ნატო: იკრძალება ნატოს ჯარების განლაგება უკრაინის ტერიტორიაზე.

ტერიტორიული დათმობები: სტატიის ავტორთა შეფასებით, წარმოდგენილი პირობებით რუსეთი აგრესიის შეწყვეტის სანაცვლოდ „ჯილდოვდება“ — მას რჩება უკვე ოკუპირებული ტერიტორიები და დამატებით ეძლევა ის რეგიონებიც, რომლებიც ჯერ არ დაუპყრია.