ევროპარლამენტმა საქართველოს შესახებ მორიგი კრიტიკული რეზოლუცია მიიღო – მას მხარი 445-მა დეპუტატმა დაუჭირა.
5 პოლიტიკური ჯგუფის მიერ შეთანხმებული რეზოლუცია “ქართული ოცნების მიერ ოპოზიციური პარტიების აკრძალვის მცდელობის შესახებ” ოპოზიციური პარტიების აკრძალვას ეწინააღმდეგება და მათ წინააღმდეგ საკონსტიტუციო სასამართლოში შეტანილი სარჩელის უკან გატანას ითხოვს – რეზოლუციის პროექტი ამას საქართველოში უფრო ფართო დემოკრატიული უკუსვლის ნაწილად განიხილავს.
რეზოლუცია სხვადასხვა ფორმით, ევროკავშირს “ქართული ოცნების” ხელისუფლების წარმომადგენლებისა და სხვა პასუხისმგებელი პირების წინააღმდეგ დამატებითი სანქციებისკენ მოუწოდებს. მათ შორის, მიზანმიმართულ სანქციებს ბიძინა ივანიშვილის, ირაკლი კობახიძის, შალვა პაპუაშვილისა და კახა კალაძის წინააღმდეგ.
რეზოლუციაში დიდი ყურადღება ეთმობა პოლიტიკურ პატიმრებს. მოთხოვნილია მათი დაუყოვნებლივი და უპირობო გათავისუფლება და ე.წ. “საბოტაჟის” საქმეებზე პოლიტიკურად მოტივირებული ბრალდებების მოხსნა.
რეზოლუციაში ასევე საუბარია სასამართლოს დამოუკიდებლობაზე, სამოქალაქო საზოგადოებისა და მედიისთვის შექმნილ შეზღუდვებზე და ევროკავშირში საქართველოს ინტეგრაციის პროცესზე.
იქამდე, 7 ოქტომბერს, ევროპარლამენტში საქართველოს შესახებ დებატები გაიმართა.