ევროკომისიამ უკრაინას €90-მილიარდიანი სასესხო პაკეტის თავდაცვის კომპონენტიდან €1.24 მილიარდი გადაურიცხა, რაც უკრაინული კომპანიების მიერ წარმოებული დრონების, გზაგადამჭერი დრონების, დრონებისთვის განკუთვნილი საბრძოლო მასალებისა და რაკეტების დაფინანსებას მოხმარდება.
“რუსეთი ტერორის მიზანმიმართულ სტრატეგიას აგრძელებს – ცდილობს, უკრაინელებისთვის ყოველდღიური ცხოვრება აუტანელი გახადოს. დღევანდელი გადარიცხვა ხელს შეუწყობს უკრაინის თავდაცვის ინდუსტრიისა და თავდაცვისუნარიანობის გაძლიერებას, ადამიანებისა და ინფრასტრუქტურის დაცვას.” – თქვა ევროკომისიის პრეზიდენტმა ურსულა ფონ დერ ლაიენმა.
უკრაინის დასახმარებლად შემუშავებული სასესხო პაკეტის ფარგლებში 2026-2027 წლებში ქვეყნის თავდაცვისა და თავდაცვითი წარმოებისთვის €60 მილიარდი, ხოლო საბიუჯეტო დახმარებისთვის €30 მილიარდია გათვალისწინებული. მხოლოდ 2026 წელს უკრაინის თავდაცვის ინდუსტრიის მხარდასაჭერად €28.3 მილიარდი უნდა გამოიყოს.
ევროკომისიის ცნობით, 2026 წლის დარჩენილ პერიოდში უკრაინისთვის კიდევ €32.5 მილიარდია ხელმისაწვდომი. აქედან €15.4 მილიარდი თავდაცვის ინდუსტრიას, ხოლო €17 მილიარდზე მეტი, შესაბამისი პირობების შესრულების შემთხვევაში, ქვეყნის ბიუჯეტის მხარდაჭერას შეიძლება მოხმარდეს.